पोलिसांकडून स्पॉट पंचनामा
नाशिक : सिडको परिसरातील उत्तमनगर येथे अडीच वर्षापूर्वी रिपब्लिकन पार्टी ऑफ इंडियाचे (आठवले गट) अँड प्रशांत जाधव यांच्यावर गोळीबार करण्यात आला होता. याप्रकरणी सात संशयितांच्या टोळीविरुद्ध पोलीस आयुक्तालयाकडून महाराष्ट्र संघटित गुन्हेगारी नियंत्रण कायद्याखाली (मोक्का) कारवाई करण्यात आली होती. याप्रकरणी मोक्का न्यायालयाने या प्रकरणातील संशयितांना 2 डिसेंबरपर्यंत पोलीस कोठडी दिली आहे. यामुळे या संशयितांचा ताबा गुन्हे शाखेकडून घेतला जाणार असल्याने गुन्हे शाखेने तपासाला गती देत मुख्य संशयित बारक्या उर्फ श्रीकांत माणिक वाकुडे (32, जेतवनगर) यास ताब्यात घेत तपासी अधिकारी व सहायक पोलिस आयुक्त संदीप मिटके यांच्या पथकाने घटनास्थळ गाठत पंचनामा केला. अंबड पोलीस ठाण्याच्या हद्दीत 2022 ला ही गोळीबाराची घटना घडली होती पोलिसांनी या प्रकरणात संशयित आकाश आनंदा सुर्यतळ (24,रा. नाशिकरोड)श्रीकांत वाकोडे उर्फ बारक्या (32,रा जेतवनगर) सनी पगारे उर्फ टाक्या (34 रा जेतवनगर) परिनय उर्फ लक्ष्मण शेवाळे (33,रा धनलक्ष्मी चौक, सिडको) प्रसाद शिंदे (29,रा. नांदूरगाव) मयूर चमन बेद (37,फर्नांडिस वाडी) यांना पोलिसांनी बेड्या ठोकल्या आहेत. ही टोळी मध्यवर्ती कारागृहात होती. या संशयितांचा ताबा गुन्हे शाखेने घेतला आहे. मुख्य संशयित बारक्या याला पोलिसांनी उत्तमनगर ते उपेंद्रनगर पासून घटनास्थळी घेऊन जात कोठून कशा पद्धतीने जाधव यांच्या दिशेने गोळीबार केला ? कुठल्या मार्गाने संशयित पळाले ? याची माहिती घेतल्याचे समजते. या गुन्ह्यात संशयित दीपक बडगुजर यास न्यायालयाने सशर्त अटकपूर्व जामीन मंजूर केला आहे. संशयितांची टोळी संघटितपणे शहरात गुन्हेगारी करत असल्याचे निदर्शनास आल्याने पोलीस उपायुक्त मिटके यांनी मोकाच्या कारवाईचा प्रस्ताव पोलीस आयुक्त संदीप कर्णिक यांच्याकडे पाठविला होता .नेमक्या निवडणुकीच्या तोंडावर हा प्रस्ताव मंजूर करण्यात आल्याने नाशिक शहरात खळबळ उडाली होती. याला राजकीय किनार असल्याची चर्चा देखील शहरात सुरू होती.
