ही जागा शिवसेनेचीच आमचा आग्रह नाही तर हट्ट -संजय शिरसाठ
नासिक : लोकसभा मतदारसंघासाठी स्थानिक नेत्यांमध्ये आपल्याच पक्षाला उमेदवारी मिळावी यासाठी रस्सीखेच सुरू होती. आता मात्र यामध्ये ज्येष्ठ नेत्यांनी देखील उड्या घेतल्या असून आपल्याच पक्षाला उमेदवारी मिळाली पाहिजे असे प्रयत्न सुरू केल्याचे चित्र आहे. यावेळी अजित पवार गटाचे राष्ट्रवादीचे ज्येष्ठ नेते प्रफुल्ल पटेल म्हणाले नाशिकची जागा जरी शिंदे गटाची आहे तरी त्यांनी एक जागा कमी घेण्याचे मान्य केले आहे. यामध्ये भाजपाने तयारी दाखवली तर आम्हाला बरं वाटेल. नाशिक मध्ये उमेदवार कोण ते नंतर ठरवले जाईल. एकदा जागा निश्चित झाली की उमेदवारी बाबत चर्चा करू काही लोक मात्र जागा कुणाची हे निश्चित होण्याच्या आधीच उड्या मारायला लागतात. कार्यक्रम करून टाकू अशा धमक्या देतात हे योग्य नाही. नाशिकची जागा आम्ही नक्कीच मागतोय तिथे कोणाला उभे करायचे तो आमचा अंतर्गत विषय आहे. असे प्रफुल्ल पटेल म्हणाले. यावर प्रतिक्रिया देताना शिंदे गटाचे प्रवक्ते संजय शिरसाट म्हणाले नाशिकची जागा ही शिवसेनेची आहे. त्या ठिकाणी शिवसेनेचा विद्यमान खासदार आहे. ती जागा शिवसेनेलाच मिळाली पाहिजे हा आमचा आग्रह नाही तर हट्ट सुद्धा आहे. त्यामुळे नाशिकची जागा शिवसेनेला मिळणारच यात शंका नाही. हा आता आमच्या प्रतिष्ठेचा प्रश्न झालेला आहे. शिंदे साहेबांनी सर्वच जागा सोडायचे मान्य केले का ? शिरूरची जागा तुम्हाला दिली ना, म्हणून आम्ही विनंती करतो ज्या ज्या जागा आमच्या आहेत त्या आम्हाला लढवण्याचा अधिकार आहे. त्या जागा आम्हाला मिळाव्यात अशी आमची भूमिका आहे असेही शिरसाठ म्हणाले या वादात कोणत्या पक्षाकडे नाशिक लोकसभा जाणार ? उमेदवार कोण असणार हे येत्या तीन दिवसात निश्चित होईल.
