मागील लोकसभेत घेतली होती चौथ्या क्रमांकावर झेप
नाशिक : सध्या राज्याच्या राजकारणात प्रकाश आंबेडकर यांच्या वंचित बहुजन आघाडीने ट्विस्ट निर्माण करत आपले उमेदवार घोषित करणे सुरू केले आहे. नाशिक लोकसभा मतदारसंघातही ‘वंचित’ कडून तगडा उमेदवार दिले जाण्याचे संकेत मिळत आहे. त्यामुळे नाशिक जिल्ह्याच्या राजकारणात वंचितचा फॅक्टर आपले फासे कसे फेकतो याकडे राजकीय वर्तुळाचे लक्ष लागून आहे. गेल्या लोकसभा निवडणुकीत वंचित बहुजन आघाडीने महाराष्ट्रात चांगली मते घेत आपले अस्तित्व दाखवून दिले होते. त्यामुळे यंदा वंचितला सोबत घेण्यासाठी महाविकास आघाडीने शर्तीचे प्रयत्न केले तर उद्धव ठाकरे गटाने वंचित बरोबर युती करून नव्या समीकरणांची जुळवाजुळ चालवली होती परंतु जागा वाटपातील मतभेदामुळे वंचित ने “एकला चलो” ची भूमिका ठेवली आहे. त्यातूनच प्रकाश आंबेडकर यांनी काही जागांवर आपले उमेदवार घोषित केले आहेत. तर काही ठिकाणी काँग्रेसला पाठिंबा दिला आहे नाशिक जिल्ह्यात गेल्या निवडणुकीत नाशिक लोकसभा मतदारसंघात पवन पवार यांनी एक लाख 981 म्हणजेच 9.87% मते घेत चौथ्या क्रमांकावर झेप घेतली होती. आता नाशिकच्या जागेबाबत भाजप राष्ट्रवादी व शिंदे गट यांच्यात रस्सीखेच सुरू असताना वंचित कडून मातब्बर उमेदवार दिला जाण्याचे संकेत मिळत आहेत त्यामुळे राजकीय वर्तुळाचे लक्ष हे वंचित बहुजन आघाडीच्या उमेदवाराकडे लागून आहे.
