नाशकातील राजकीय वारे वेगळ्याच दिशेने….
नाशिक : महानगरपालिकेच्या निवडणुकीत नाशकात मोठ्या घडामोडी घडत आहेत. यामध्ये शिंदे गटाच्या शिवसेनेकडून छगन भुजबळ यांना धक्के दिले जात असून त्यांचे विश्वासू सहकारी शिंदे गटाच्या शिवसेनेत जात असल्याने राजकीय वर्तुळात आश्चर्य व्यक्त केले जात आहे . महानगरपालिकेच्या निवडणुकीच्या पार्श्वभूमीवर राज्यात राजकीय घडामोडींना वेग आला आहे. सध्या संपूर्ण राज्यात एकाच वेळी 29 महापालिकांच्या निवडणुका होत असून त्यासाठी 15 जानेवारी रोजी मतदान होणार आहे. सोबतच या निवडणुकीचा निकाल 16 जानेवारी रोजी लागेल. दरम्यान, या निवडणुकीमध्ये नाशिक महानगरपालिकेच्या निवडणुकीत चांगलीच चुरस रंगणार आहे. मिळालेल्या माहितनुसार मंत्री छगन भुजबळ यांचे कट्टर समर्थक कैलास मुदलियार यांनी एकनाथ शिंदे यांच्या शिवसेनेत काल प्रवेश केला होता. नाशिकमध्ये मुदलियार यांची ओळख ही भुजबळ यांचे कट्टर समर्थक अशीच होती. याच मुदलियार यांनी आता शिंदे यांच्या शिवसेनेत प्रवेश केला आहे.आणि आज छगन भुजबळ यांच्या समता परिषदेच्या पदाधिकारी असलेल्या व भुजबळ यांच्या निकटवर्तीय समजल्या जाणार्या कविता कर्डक यांनी शिंदे गटाच्या शिवसेनेत प्रवेश केल्याने छगन भुजबळ यांना हा दुसरा मोठा धक्का मानला जात आहे. मुख्य म्हणजे दोन्ही पक्ष प्रवेशावेळी मंत्री दादा भुसे उपस्थित होते. त्यामुळे शिंदे गटाच्या शिवसेनेकडून भुजबळांच्या बालेकिल्ल्यात भुजबळांना धक्के देण्यामागे काय राजकारण दडले आहे. याची राजकीय वर्तुळात चर्चा असून शिंदे गट स्वबळाची तयारी तर करत नाही ना अथवा ही राजकीय खेळी तर नाही ना अशी चर्चा कार्यकर्त्यांमध्ये व्यक्त होत आहे.
