नाशकात भाजप लढणार स्वबळावर
नाशिक : शहरातील महानगर पालिकेच्या निवडणुकीचे वारे आता वेगळ्याच दिशेने वाहू लागले आहेत. महायुती मध्ये फाटाफूट झाली असून भाजप स्वबळावर लढणार आहे. तर शिंदे गटाची शिवसेना आणि अजित पवार गटाची राष्ट्रवादी एकत्रित महापालिकेच्या निवडणूकांना सामोरे जाणार आहेत. दुसरीकडे महाविकास आघाडीत वर शिक्कामोर्तब झाले असून या आघाडीत मनसेच्या रूपाने नवा भिडू आला आहे.नाशिकमध्ये महायुतीने एकत्रित निवडणूक लढवावी असा प्रयत्न सुरू होता. परंतु भाजपा मित्रपक्ष असलेल्या शिंदे गटाच्या शिवसेनेला आणि अजित पवार गटाच्या राष्ट्रवादीला कमी जागा देत होते.महायुतीतील बैठकांमध्ये भाजपा ८२, अजित पवारांची राष्ट्रवादी 6 तर शिंदे गटाची शिवसेना 35 असा प्रस्ताव ठेवण्यात आल्याचे समजते. परंतु त्यावर एकमत न झाल्याने त्यामुळे जागावाटपावरून या तिन्ही पक्षात एकमत झाले नाही. गेल्या अनेक दिवसांपासून मंत्री गिरीश महाजन,मंत्री दादा भुसे,समीर भुजबळ, प्रवीण तीदमे, नरहरी झिरवाळ,रंजन ठाकरे यांच्या बैठका सुरू होत्या. मात्र जागावाटपाचा तिढा सुटत नव्हता त्यामुळे अखेर महायुतीत फुट पडली. मिळालेल्या माहितीनुसार युतीत शिंदे गटाची शिवसेना मोठ्या भावाच्या भूमिकेत असणार आहे. साधारण ९० जागा शिंदे गटाची शिवसेना लढवणार आहे. तर ३० जागा अजित पवार गटाच्या राष्ट्रवादीला मिळणार आहेत. यासाठी भुजबळ फार्मवर रात्री उशिरापर्यंत चर्चा सुरू होत्या अशी माहिती सूत्रांकडून समजते आहे. तर दुसरीकडे ठाकरे गटाची शिवसेना शरद पवार गटाची राष्ट्रवादी,काँग्रेस,महाराष्ट्र नवनिर्माण सेना अशी महाविकास आघाडी एकत्रित निवडणूक लढणार आहेत. त्याचबरोबर भाजपचा पराभव करण्यासाठी इतर घटक पक्ष देखील विकास आघाडीत सामील होणार आहेत यामध्ये शरद पवार गटाला जागा वाढवून दिल्याचे समजते. इतर घटक पक्ष एकत्र आणण्यामागे मनसे आणि ठाकरेंची शिवसेना यांची भूमिका महत्वाची ठरल्याचे समजते. या घटनांमुळे नाशिक महापालिकेची निवडणूक तिरंगी होणार असल्याचे चित्र आहे.
