आपल्या देशाची प्रतिमा परदेशात मलिन, राज्यांना फटकारले
दिल्ली : देशातील अनेक राज्यांमध्ये भटक्या कुत्र्यांचा प्रश्न ऐरणीवर आला असून यामुळे शाळेत जाताना लहान मुलांना आपला जीव मुठीत घेऊन जावे लागते. भटक्या कुत्र्यांच्या हल्ल्यात अनेक लहान मुलांच्या मृत्यूच्या घटना देखील समोर आल्या आहेत. याबाबत सर्वोच्च न्यायालयाने प्रचंड संताप व्यक्त केला असून भटके कुत्रे लहान मुलांवर करत असलेल्या हल्ल्यांबाबत सर्वोच्च न्यायालयाने स्वतःहून दखल घेतलेल्या प्रकरणात आदेश देऊनही राज्यांनी प्रतिज्ञापत्रे दाखल न केल्याबद्दल न्यायालयाने प्रचंड संताप व्यक्त केला. कुत्र्यांनी हल्ला करण्याच्या घटना सातत्याने घडत असून त्यामुळे आपल्या देशाची प्रतिमा परदेशात खालावत आहे. असे ताशेरे सर्वोच्च न्यायालयाने ओढले. 22 ऑगस्ट रोजी दिलेल्या आदेशानंतरही प्रतिज्ञापत्र का दाखल केले नाही याचे स्पष्टीकरण देण्यासाठी पश्चिम बंगाल आणि तेलंगाना वगळता सर्व राज्यांच्या मुख्य सचिवांना 3 नोव्हेंबर रोजी सकाळी साडेदहा वाजता न्यायालयात हजर राहण्याचे आदेश सर्वोच्च न्यायालयाने दिले. पश्चिम बंगाल तेलंगाना आणि दिल्ली महानगरपालिका याशिवाय कोणत्याही इतर राज्याने किंवा केंद्रशासित प्रदेशाने प्रतिज्ञापत्र सादर केलेली नाहीत. या संदर्भात सर्व राज्यांना आणि केंद्रशासित प्रदेशांना नोटिसा जारी केल्या होत्या. मात्र त्यांनी प्रतिसाद दिला नाही असे न्यायालयाने म्हटले आहे यापूर्वी न्यायालयाने भटक्या कुत्र्यांवरून राज्यांना फटकारले होते.पूर्ण आकडेवारीसह प्रतिज्ञापत्र दाखल करा…. भटक्या कुत्र्यांचे दिल्ली एनसीआर पुरते मर्यादित असलेले प्रकरण सर्वोच्च न्यायालयाने विस्तारले व सर्व राज्य व केंद्रशासित प्रदेशांना पक्षकार बनवण्याचे आदेश देण्यात आले. कुत्र्यांच्या नोंदी पशुवैद्यक, कुत्रे पकडणारे कर्मचारी, विशेष वाहने, पिंजरे यासंबंधी पूर्ण आकडेवारी सह प्रतिज्ञापत्र दाखल करण्याचे निर्देश न्यायालयाने दिलेत.
