राजकारणात नव्याने येऊ पहाणाऱ्या गुंडांना पोलिसांचा धसका
नाशिक: या वर्षातील हत्यांची संख्या ४6 पर्यंत पोहचल्यावर आणि गुन्हेगार आपल्या भाईगिरीची रील सोशल मीडियावर टाकू लागल्याने भयभीत झालेले सर्वसामान्य नाशिककरही ओरड करु लागल्यावर शहर पोलिसांनी दिवाळीआधीच फटाके फोडण्यास सुरुवात केली आहे.गल्लीबोळातील कोणी गावगुंड नाही तर, या शहराचे बाॅस आपणच असल्याचे पोलिसांनी दाखवून दिल्याने राजकीय नेत्यांच्या छत्रछायेखाली पोसलेल्या गुन्हेगारांना आता धडकी भरली असेल. त्यामुळेच धास्तावलेले गुंड अज्ञातस्थळी गायब झाले असून काही जण कारवाई आपल्यापर्यंत येऊ नये म्हणून मुंबई गाठत असल्याची चर्चा आहे. नाशिकच्या राजकारणावर वर्षानुवर्षे दबदबा ठेवणारे मात्र गुन्हेगारी क्षेत्रात देखील आपले नाव कायम राखणारे त्याचबरोबर आता राजकारणात आलेले मात्र आपल्या गॉडफादरच्या मागेपुढे धावणारे, बॅनरवर फोटो टाकून रुबाब गाजवणाऱ्या सर्वच भाईंचे धाबे दणाणले आहेत.त्याउलट नाशिककर कित्येक महिन्यांपासून पोलिसांचे हे रुप पाहण्यासाठी देवाजवळ प्रार्थना करत होते आणि उशिरा का होईना, नाशिक पोलिसांना जाग आल्याने त्यांच्या कडक कारवाईचे नाशिककरांनी स्वागतच केले आहे.पूर्वीच्या सर्व केसेस मिटवत राजनेता म्हणून मिरवणारे देखील पोलीस आयुक्तांच्या धाकाने बिळात लपल्याची चर्चा आहे.तर काही गंभीर गुन्हे असलेल्या गुन्हेगारांना मोक्का नावाचा कायदा छळू लागल्याने त्यांनी आपल्या गॉडफादरकडे धाव घेतल्याचे कळते. नाशिकची गुन्हेगारी ही कायमच राजकीय पाठबळामुळेच फोफावल्याचे वारंवार उघड झाले आहे. गुन्हेगार हा कायमच आपल्या बचावासाठी सत्ताधारी पक्षाशी सलगी करीत असतो. त्यामुळे साहजिकच जे सत्तेतील पक्ष असतात, त्यांच्याकडे गुन्हेगारी कारवायांशी संबंधित मंडळींची मोठी रांग असते. कधी सामाजिक कार्यकर्ता, कधी नगरसेवक या सारख्या वेगवेगळ्या रुपात ही मंडळी वावरत असतात. मात्र यांच्यावर पोलिसांचा अंकुश हवा अशी भावना सर्वसामान्य नागरिकांमध्ये असते जर एखाद्या पोलीस अधिकाऱ्याने आपले उग्र रूप गुन्हेगारांना दाखवले तर सामान्य जनता त्या पोलीस अधिकाऱ्याला डोक्यावर घेऊन नाचते याचे उत्तम उदाहरण म्हणजे नाशिकचे तत्कालीन आयुक्त विष्णुदेव मिश्रात्याच्या काळात झालेला एन्काऊंटर नागरिकांच्या लक्षात राहिला तर टिप्पर गँगला धडा शिकविणारे कुलवंतकुमार सरंगल असोत. किंवा भूमाफियांविरुध्द कठोर कारवाई करणारे दीपक पांडे असोत. नाशिकच्या सामान्य जनतेने यांना आयडल मानलं होत.असो उशिरा का होईना पोलीस आयुक्तांनी आपले उग्र रूप दाखवले यामुळे शहरातील नामचीन गुंड व राजकारणातील गुंडांममध्ये चांगलीच दहशत निर्माण झाली आहे. आणि पोलिसांचा हा धडाका कायम असाच सुरू असावा हीच सामान्य नागरिकांची अपेक्षा
