या बदल्यानंतर तरी गुन्हेगारी आटोक्यात येईल का?
नाशिक: शहरातील वाढत्या गुन्हेगारीमुळे पोलीस दलावर मोठ्याप्रमाणात टीका होऊ लागल्यानंतर पोलिस आयुक्त संदीप कर्णिक यांनी १२ वरिष्ठ पोलीस अधिकाऱ्यांच्या तडकाफडकी बदल्या केल्या आहेत. मात्र यामुळे गुन्हेगारी आटोक्यात येणार का ? याकडे सर्वांचे लक्ष लागून आहे. देशभरात तीर्थक्षेत्र म्हणून ओळख असलेल्या नाशिक शहरात गेल्या काही महिन्यांपासून वाढत्या गुन्हेगारीमुळे आणि रोजच होणाऱ्या खुनांच्या घटनांमुळे नागरिकांमध्ये भीतीचे वातावरण निर्माण झाले आहे. अंमली पदार्थांच्या विक्रीत वाढ, तरुणाईमध्ये ड्रग्जचे वाढते व्यसन, गाड्यांची तोडफोड, भररस्त्यात कोयत्याने वार, चौकाचौकात होणारे खून यामुळे नाशिक हे गुन्ह्यांचे शहर म्हणून ओळखले जाऊ लागले आहे. त्यामध्ये काही राजकीय व्यक्तींचा सहभाग उजेडात आल्याने आता गुन्हेगार आणि राजकीय नेते व त्यांची मैत्री हा देखील चर्चेचा विषय झाला आहे. मात्र यामुळे नाशिकची देशभरात प्रतिमा गुन्हेगारीची झाली असल्याचे दबक्या आवाजात बोलले जात आहे .यादरम्यान सत्ताधारी पक्षातील नेत्यांनी शहरातील वाढत्या गुन्हेगारी संदर्भात पोलीस आयुक्तांची भेट घेऊन गुन्हेगारी मोडीत काढण्याच्या सूचना दिल्या होत्या. यामध्ये मंत्री दादा भुसे यांनी पोलीस आयुक्त संदीप कर्णिक यांची भेट घेत गुन्हेगारी मोडीत काढण्याच्या सूचना दिल्या असतानाच शहरातील भाजपच्या तीन आमदारांनी मुख्यमंत्री देवेंद्र फडणवीस यांची भेट घेत शहरातील वाढत्या गुन्हेगारीबाबत चर्चा केली होती. त्यानंतर या आमदारांनी पोलीस आयुक्तांची भेट घेत शहरातील वाढती गुन्हेगारी रोखण्यासाठी कडक पावलं उचलण्याची मागणी केली होती. त्याआधी ठाकरेंच्या शिवसेनेने शहरात मोर्चा काढत वाढत्या गुन्हेगारी बाबत गृहमंत्री देवेंद्र फडणवीस यांच्यावर टीका केली होती.यामध्ये महाराष्ट्र नवनिर्माण सेना देखील सहभागी झाली होती.त्यानंतर आता नाशिकचे पोलीस आयुक्त ॲक्शन मोडवर आले असून त्यांनी १२ पोलीस ठाण्यांच्या वरिष्ठ पोलीस अधिकाऱ्यांच्या तडकाफडकी बदल्या केल्या आहेत. त्यानुसार अंबड पोलीस ठाण्याचे वरिष्ठ निरीक्षक मधुकर कड यांची गंगापूर ठाण्यात, गंगापूरचे वरिष्ठ निरीक्षक जगवेंद्रसिंग राजपूत यांची अंबड, तसेच अंबडचे दुय्यम निरीक्षक मनोहर कारंडे यांची इंदिरानगर, भद्रकालीचे वरिष्ठ निरीक्षक प्रकाश अहिरे यांची सातपूर पोलीस ठाण्यात बदली करण्यात आली आहे.सायबर पोलीस ठाण्याचे निरीक्षक उमेश पाटील यांची आडगाव, मुंबई नाकाचे वरिष्ठ निरीक्षक संतोष नरोटे यांची एमआयडीसी चुंचाळे, सातपूरचे वरिष्ठ निरीक्षक रणजित नलावडे यांची विशेष शाखा, आडगावचे वरिष्ठ निरीक्षक संजय भिसे यांची सायबर, एमआयडीसी चुंचाळेचे वरिष्ठ निरीक्षक विश्वास पाटील यांची मुंबई नाका, इंदिरानगरच्या वरिष्ठ निरीक्षक तृप्ती सोनवणे यांची शहर वाहतूक शाखा एक , शहर वाहतूक शाखा एकचे वरिष्ठ निरीक्षक तुषार आढाव यांची सातपूर, शहर वाहतूक शाखा सातपूर युनिटचे वरिष्ठ निरीक्षक रियाज शेख यांची शहर वाहतूक शाखा द्वारका युनिट येथे बदली करण्यात आली आहे.
