गुन्हेगारांबरोबर राजकीय कनेक्शन उघड.
नाशिक : काही दिवसांपूर्वी हत्या प्रकरणात भाजपचे माजी नगरसेवक उध्दव निमसे पोलिसांना शरण आले असताना आज पुन्हा रविवारी भाजपच्या माजी नगरसेवकाला पोलिसांनी अटक केल्याने भाजपात खळबळ उडाली आहे.मुख्य म्हणजे कुंभमेळा मंत्री गिरीश महाजन हे आज (रविवार) नाशिक येथे असताना ही घटना घडल्याने राजकीय क्षेत्रात चर्चा सुरू आहे. मिळालेल्या माहितीनुसार 17 सप्टेंबर रोजी रात्रीच्या सुमारास नाशिकच्या पंचवटी भागात सागर जाधव (वय,३५ ) याच्यावर गोळीबार करत जीवघेणा हल्ला करण्यात आला होता. या हल्ल्यात तो गंभीर जखमी झाला. या घटनेने शहरात एकच खळबळ उडाली होती. या गोळीबारात सागर याच्या मानेत गोळ्या घुसल्याने गंभीर जखमी अवस्थेत त्याला रुग्णालयात दाखल करण्यात आले होते.पोलिसांनी घटनेचे गांभीर्य लक्षात घेत तात्काळ तपासाची चक्रे फिरवून या घटनेतील जवळजवळ ११ संशयित आरोपींना पोलिसांनी ताब्यात घेतले आहे. त्यातच आता मिळालेल्या नुसार राहुलवाडी, फुलेनगर येथील सागर जाधव गोळीबार प्रकरणाच्या कटात सहभागी असल्याच्या संशयावरुन पंचवटी पोलिसांनी भाजपचा माजी नगरसेवक जगदीश पाटील यांना आज अटक करण्यात आली. तर काही दिवसांपूर्वी नांदूर नाका येथे झालेल्या धोत्रे हत्या प्रकरणात भाजपचे माजी नगरसेवक उद्धव निमसे हे पोलिसांना शरण आले होते.आणि आज पुन्हा गोळीबारा सारख्या गंभीर गुन्ह्यात भाजपचेच माजी नगरसेवक जगदीश पाटील यांना अटक झाल्याने राजकीय वर्तुळात मोठी खळबळ उडाली आहे.या प्रकरणामुळे भाजप मध्ये अस्वस्थता वाढली असून काही दिवसांपूर्वी भाजपात घेण्यात आलेल्या नेत्यांमुळे निष्ठावंत कार्यकर्ते नाराज असल्याची चर्चा सुरू असून दोन वेगवेगळ्या प्रकरणात भाजपच्या दोन माजी नगरसेवकांना अटक झाल्याने पक्षाची प्रतिमा डागाळली असल्याचे कार्यकर्ते व्यक्त करत आहेत.
