मंत्री गिरीश महाजन यांच्या दौऱ्यात आ सीमा हिरे, आ राहुल ढिकले यांनी फिरवली पाठ
नाशिक : शतप्रतिशत चा नारा देणाऱ्या भाजपमध्ये मोठ्या संख्येने इतर पक्षातील नेते येत आहेत. यामध्ये भाजपने देशद्रोहासारखे आरोप केलेले नेते देखील असल्याने भाजप मधील जुनी फळी असलेले नेते व कार्यकर्ते नाराज असल्याची चर्चा आहे. मुंबई येथे नुकताच ठाकरे गटाचे सुधाकर बडगुजर, मंत्री बबनराव घोलप देवानंद बिरारी, दिलीप दातीर, अशोक मुतडक यांनी भाजप मध्ये प्रवेश केला त्यानंतर गुरुवारी जलसंपदा मंत्री गिरीश महाजन हे नाशिकच्या दौऱ्यावर असताना त्यांच्या आजूबाजूला जुन्या पदाधिकाऱ्यांपेक्षा पक्षात दोन दिवसांपूर्वी आलेल्या नेत्यांचाच मोठ्याप्रमाणात गराडा दिसला.दिवसभरातल्या महाजन यांच्या दौऱ्यात आ सीमा हिरे आणि आ. राहुल ढिकले यांची अनुउपस्थिती याचीच चर्चा होती. त्याचबरोबर महानगरपालिकेच्या भेटीत सुधाकर बडगुजर हेच प्रमुख नेते म्हणून सर्वात पुढे होते. तर कुंभमेळा मंत्री म्हणून प्रस्थावित सिहस्थाबाबत आढावा घेण्यासाठी महाजन हे दुपारच्या सुमारास गेस्ट हाऊसवर दाखल झाले त्यावेळी नुकतेच ठाकरे गटातून भाजपात प्रवेश झालेले सुधाकर बडगुजर यांच्यासह देवानंद बिरारी, दिलीप दातीर यांच्यासह त्यांच्या कार्यकर्त्यांनी गिरीश महाजन यांचे जल्लोषात स्वागत केले. त्याचबरोबर गिरीश महाजन हे ताफ्यासह महापालिकेत दाखल झाल्यावर सुधाकर बडगुजर हेच त्यांना घेऊन मनपा आयुक्तांच्या केबिनमध्ये दाखल झाले त्याचबरोबर मनपात असलेल्या म्युनिसिपल कर्मचारी सेनेच्या कार्यालयात महाजन यांना घेऊन जात सुधाकर बडगुजर यांनी त्यांचा सत्कार देखील केला. महाजन यांनी दौऱ्यात अतिक्रमण हटाव मोहिमेची माहिती घेतली त्याचबरोबर गोदाकाठावर जाऊन पूरपरिस्थितीची पाहणी व नियोजनाबाबत माहिती घेतली. या वेळी आमदार देवयानी फरांदे मात्र दौऱ्यात पूर्णवेळ होत्या मात्र या दौऱ्यात दोन आमदारांची गैरहजेरी व नवीन पक्षात प्रवेश केलेल्यांची महाजन यांच्या आजूबाजूला गर्दी बघता नाशकात आता भाजपात नवा गडी, नवा राज सुरू झाला की काय अशी जोरदार चर्चा होती.
