पालकमंत्रीपदाचा तिढा सुटणार का ?
नाशिक : मुख्यमंत्री देवेंद्र फडणवीस आज (दि 1) नाशिक शहराच्या दौऱ्यावर येणार असून ते कुंभमेळ्याच्या पूर्वतयारीचा आढावा घेणार आहे. त्रंबकेश्वर येथील कुंभमेळ्याच्या तारखा घोषित झाल्या असून नाशिकच्या कुंभमेळ्याच्या तारखा मात्र मुख्यमंत्री देवेंद्र फडणवीस यांच्या उपस्थितीत होणाऱ्या बैठकीसाठी घोषित झालेल्या नव्हत्या. अखेरीस आज नाशिकच्या जिल्हाधिकारी कार्यालयात ही बैठक होणार असून त्यात या तारखा घोषित होतील तसेच साधू महंतांच्या विविध मागण्यावर देखील मुख्यमंत्री निर्णय घेण्याची शक्यता आहे. नाशिक व त्र्यंबकेश्वर येथील तेरा आखाड्याचें प्रमुख दोन पदाधिकारी या बैठकीसाठी उपस्थित राहणार आहेत. साधू महंताना आणण्यासाठी प्रशासनाने विशेष व्यवस्था केली आहे. प्रत्येक आखाड्यासाठी एक वाहन तैनात असणार आहे. त्याचबरोबर नाशिकच्या पालकमंत्री पदी नियुक्ती रखडल्यामुळे याचा परिणाम कुंभमेळ्याच्या आणि जिल्ह्याच्या विकासकामांच्या कामांवर होत आहे. विधानसभा निवडणुकीपूर्वी तत्कालीन पालकमंत्री दादा भुसे यांनी जून महिन्यात शेवटची नियोजन मंडळाची बैठक घेतली त्यानंतर आजवर अशा प्रकारची बैठक झालेली नाही. काही जिल्ह्याना दोन-दोन पालकमंत्री असताना कुंभमेळा तोंडावर येत असताना नाशिक मध्ये मात्र एकही पालकमंत्री अजून पर्यंत नियुक्ती होऊ शकलेला नाही याबाबत देखील आज मुख्यमंत्री काय निर्णय घेतात याकडे नाशिककरांचे लक्ष लागून आहे
