शहरातील खुनाचे सत्र थांबेना
नाशिक : चित्रपटांमध्ये दगडाने ठेचून हत्या करण्याची घटना आपण बघितली आहे. मात्र, नाशिकमध्ये वास्तव्यात अशी भयानक घटना समोर आली आहे. सिडको परिसरातील कामठवाडे परिसरात टोळक्याने एका युवकाला घेरत दगड, फारशीच्या तुकड्यांनी ठेचून खून केल्याची खळबळ जनक घटना घडली आहे. मिळालेल्या माहितीनुसार अंबड पोलिस ठाणे हद्दीतील कामटवाडे भागात असलेल्या स्मशानभूमीच्या रस्त्यावर एका टोळक्याने आज दुपारच्या सुमारास (दि 28 सोमवार) करण चौरे (18 रा संत कबीर नगर झोपडपट्टी) या युवकाला मागील भांडणाची कुरापत काढत घेरण्यात आले .या भांडणाचे रूपांतर हाणामारी झाले यादरम्यान या टोळक्याने परिसरात पडलेल्या विटा, दगड, फरशीच्या तुकड्यांनी करणवर जोरदार हल्ला चढविला. डोक्यावर जोरदार प्रहार झाल्याने करण रक्ताच्या थारोळ्यात जागीच कोसळला. त्यानंतर ते टोळके घटनास्थळावरून पळाले. पोलिसांनी घटनास्थळी धाव घेतली असता तोपर्यंत करणचा मृत्यु झाला होता. मिळालेल्या माहितीनुसार हल्ला करणारे टोळक्यामध्ये अल्पवयीन मुले असल्याचे समजते. घटनास्थळी सहायक पोलिस आयुक्त शेखर देशमुख, वरिष्ठ पोलीस निरीक्षक राकेश हांडे, पोलिस निरीक्षक जयंत शिरसाठ यांच्यासह पोलिस अधिकारी व कर्मचारी दाखल झाले आहेत.संशयित आरोपींना लवकर ताब्यात घेतले जातील असे पोलिसांकडून सांगण्यात आले आहे.
