सिग्नल सुरू असताना दुचाकी बाजूला केली नाही म्हणून ठार मारण्याचा प्रयत्न
नाशिक : शहरात एका मस्तवाल कारचालकाने अगदी किरकोळ कारणावरून दुचाकी स्वाराला कारखाली चिरडून ठार मारण्याचा प्रयत्न केल्याची धक्कादायक घटना उघडकीस आली आल्याने नागरिकांनी संताप व्यक्त केला आहे. मिळालेल्या माहितीनुसार शहरातील त्र्यंबक रोडवरील महाराष्ट्र पोलीस अकादमीच्या अलीकडे असलेल्या एका सिग्नलवर प्रेम प्रफुल्ल बोंडे (२१, रा. सिटी मॉलच्या मागे, संभाजी चौक, उंटवाडी) प्रेम व त्याचा आतेभाऊ आर्यन रविवारी (दि.२०) रात्री नऊच्या सुमारास दुचाकी (एमएच ०४ इके ७३४५)वरून त्र्यंबकरोडने जात होते. ते हॉटेल सिबल येथील सिग्नलवर थांबले होते. यादरम्यान सिग्नल लाल असल्याने तो हिरवा होण्याची प्रतीक्षा दुचाकी चालक करत असताना पाठीमागून आलेल्या काळ्या रंगाच्या कार (15 जेए 5558) चालकाने जोरजोरात हॉर्न वाजविला. मात्र दुचाकी चालकाने दुचाकी बाजूला घेतली नाही. यादरम्यान कारचालकाने दुचाकीस्वाराचा पाठलाग सुरू केला. मुख्य म्हणजे दुचाकीस्वाराने हेल्मेट परिधान केले होते त्या हेल्मेटमध्ये कॅमेरा देखील बसविलेला होता. यावेळी कारचालकाने पाठलाग करत सुरवातीला पोलीस अकादमीसमोर दुचाकीला कट देत खाली पाडण्याचा प्रयत्न केला. तो अयशस्वी झाल्यानंतर पुन्हा काही मीटर अंतरावर त्याने असाच प्रयत्न केला. त्यावेळी देखील दुचाकीस्वार व त्यांचा भाऊ थोडक्यात बचावले अखेर दुचाकीस्वाराने रस्ता बदलत एबीबी सर्कलकडून दुचाकी उंटवाडीच्या दिशेने नेली. तरीदेखील कारने त्यांचा पाठलाग सुरूच ठेवला. त्याने ठक्कर डोमजवळच्या वळणावर पुन्हा कट मारला मात्र याठिकानी देखील ते बालबाल बचावले मात्र उंटवाडी सिग्नलजवळ त्यांची दुचाकी पोहचल्यावर तर त्याने थेट कार अंगावर घालून जीवे मारण्याचा प्रयत्न केला अखेर दुचाकीला कारची धडक बसली .त्यामुळे दुचाकीवरील दोघे रस्त्यावर पडले. या अपघातामध्ये दुचाकीवरील आर्यन यास दुखापत झाली याप्रकरणी गंगापूर पोलिसात जीवे ठार मारण्याचा प्रयत्नासह अपघाताचा गुन्हा दाखल करण्यात आला आहे. यादरम्यान धडक दिल्याने कारच्या नंबर प्लेटचे नुकसान होऊन तुकडे पसरले होते. यावेळी कारचालक घटनास्थळावरून फरार झाला होता. त्यामुळे पोलिसांना त्याला शोधण्याचे आवाहन होतेच मात्र पोलिसांनी नंबर प्लेटचे तुकडे जोडत नंबर प्लेट तयार करून प्रादेशिक परिवहन विभागाकडून माहिती घेतली. यादरम्यान कार चालकाचा शोध लागला असून संशयित कारचालक शाहरुख फारूक शेख (30 रा खडकाळी) यास अटक करण्यात आली आहे.दुचाकीस्वाराच्या हेल्मेट मध्ये कॅमेरा असल्याने सर्व घटना त्यात कैद झाली आहे. पुढील तपास सहायक निरीक्षक पवार करीत आहेत. ही कारवाई सहायक पोलीस निरीक्षक मोतीलाल पाटील, गुन्हे शोध पथकासह भद्र्काली पोलिसांनी केली.
कायद्यापेक्षा कोणी मोठं नाही…….संशयित शाहरूख शेख याने वेगवेगळ्या संघटनांचा पदाधिकारी असल्याचा बनाव केला. सुरुवातीला त्याने अपघात माझ्याकडून झाला नसल्याचे सांगितले. त्याला व्हिडीओ आणि कारची नंबरप्लेट दाखवताच त्याने गुन्ह्याची कबुली दिली. या गुन्ह्यात क्षणिक राग कारणीभूत असल्याचे समोर आले आहे.
जग्वेंद्रसिंग राजपूत, वरिष्ठ पोलीस निरीक्षक, गंगापूर
