नाशकात एका रुपयाच्या वादातून व्यक्तीचा खून 

अपंग टपरीचालकाने रागातून केली हत्या

नाशिक : शहरात खुनाचे सत्र सुरूच असून काही दिवसांपूर्वी सिडकोच्या शुभमपार्क परिसरात तरुणाच्या खुनाची घटना ताजी असतानाच आज धक्कादायक घटना घडली असून फक्त एक रुपया साठी सिडकोच्या परिसरात एका अपंग टपरीचालकाने एका मद्यपी व्यक्तीची हत्या केल्याने परिसरात खळबळ उडाली आहे.

मिळालेल्या माहितीनुसार सिडकोतील राजे संभाजी स्टेडियमच्या पाठीमागील बाजूला रस्त्याच्या कडेला अपंग टपरी चालक बापू जगन्नाथ सोनवणे (59,रा. शिवपुरी चौक) यांची टपरी आहे. आज संध्याकाळी एक मद्यपी ग्राहक सिगरेट पिण्यासाठी टपरीवर आला. यावेळी १० रुपयांची सिगरेट ११ रुपयांना का दिली? याचा जाब विचारून ग्राहकाने टपरी चालकाच्या टपरीतील साहित्याची नासधूस करत शिवीगाळ केली. याचा राग आल्यानं टपरी चालकाने ग्राहकाला काठीच्या सहाय्याने जबर मारहाण केली. या मारहाणीत ग्राहकाच्या डोक्यातून मोठ्या प्रमाणात रक्तस्त्राव झाल्याने त्याचा मृत्यू झाला. विशाल भालेराव( 50 रा. पाथर्डी फाटा) असं मृत्यू झालेल्या ग्राहकाचं नाव असून मारहाणीच्या या घटनेत यांचा मृत्यू नेमका कसा झाला याचा शवविच्छेदन अहवाल आल्यानंतर पोलिसांकडून पुढील कारवाई केली जाणार आहे. दरम्यान, पोलिसांनी टपरी चालक सोनवणे याला ताब्यात घेतलंय.