निवडणुकीतील यशाबद्दल मानले नाशिककरांचे आभार
नाशिक : शहरातील अनंत कान्हेरे मैदानावर उपमुख्यमंत्री एकनाथ शिंदे यांच्या आभार सभेचे आयोजन करण्यात आले होते. यादरम्यान कुणाचेही नाव न घेता शिंदे यांनी ठाकरे गटावर व संजय राऊत यांच्यावर टीकास्त्र सोडले. मला महादजी शिंदे पुरस्कारमिळाल्यावर अनेकांना पोटदुखी झाली. माझी लाईन पुसण्यापेक्षा माझ्यापेक्षा अधिक काम करून दाखवत तुमची लाईन मोठी करण्याचे आवाहन एकनाथ शिंदे यांनी केले. तुम्हाला नेते कार्यकर्ते का सोडून जात आहेत ?याचा विचार करा. कार्यकर्त्यांना घरगडी समजू लागल्यामुळेच सर्व तुम्हाला सोडून जात आहेत. शोले तील असरानीप्रमाणे तुमच्या मागे कुणीच उरणार नाही असा इशारा देखील शिंदे यांनी दिला. मोगलांच्या घोड्यांना पाण्यात संताजी धनाजी दिसायचे व ते बिचकायचे तसेच विरोधकांना सर्वत्र एकनाथ शिंदे दिसतात. मात्र नागरिकांनी विधानसभेत विरोधकांना घरी बसवले. आम्ही जनतेचा विश्वास संपादन केला आहे. त्या विश्वासाला तडा जाऊ देणार नाही, असा दावा करत शिवसेनेकडे अन्य पक्षातून सुरू असलेला प्रवेशाचा ओघ असाच सुरू राहील. माझ्याकडे येणाऱ्यांचे मी स्वागत करतो. असेही शिंदे म्हणाले.महाराष्ट्र विधानसभा निवडणुकीत महायुतीच्या दोनशेपेक्षा अधिक जागांवर विजय मिळवून दाखविण्याचा शब्द मी खरा करून दाखविला. ‘एक बार कमिटमेंट कर दी तो मै अपने आप की भी नही सुनता’ अशी फिल्मी डायलॉगबाजी करत मला हलक्यात घेऊ नका. हलक्यात घेणाऱ्यांचे काय होते ते अवघ्या महाराष्ट्राने बघितले, अशा शब्दांत उपमुख्यमंत्री तथा शिवसेनेचे मुख्य नेते एकनाथ शिंदे यांनी ठाकरेंबरोबर भाजप आणि अजित पवार गटाच्या राष्ट्रवादीच्या नेत्यांनाही गर्भित इशारा दिला. यादरम्यान स्थानिक स्वराज्य संस्थांच्या निवडणुकीत त्यांना कायमचे घरी बसवण्याचे आवाहन उपमुख्यमंत्री शिंदे यांनी कार्यकर्त्यांना केले. निवडणुकीत यश मिळाल्याबद्दल त्यांनी नाशिककरांचे आभार मानले.यावेळी व्यासपीठावर मंत्री दादा भुसे, मंत्री गुलाबराव पाटील, आ. सुहास कांदे, मीना कांबळी, ज्योती वाघमारे, माजी खासदार हेमंत गोडसे, सचिव भाऊसाहेब चौधरी, सहसंपर्कप्रमुख राजू लवटे, उपनेते अजय बोरस्ते, विजय करंजकर, महानगरप्रमुख प्रवीण तिदमे आदी उपस्थित होते.
