महापालिका आयुक्तांचे आदेश
नाशिक : महापालिकेच्या थकीत घरपट्टीची रक्कम पाचशे कोटी रुपयांवर गेली असून मार्च अखेर म्हणजे अवघ्या दोन महिन्यात ही रक्कम वसूल करण्याचे तगडे आव्हान महापालिकेसमोर असल्याने महापालिका आयुक्तांनी नोटिसा देऊन जप्तीच्या कारवाईचे आदेश दिले आहेत. त्याचबरोबर ज्या मिळकतीच्या बाबत प्रतिसाद मिळत नाही, अशा मिळकतीवर बोजा चढवण्याची कारवाई लवकरच करण्यात येणार आहे. महापालिकेचे आयुक्त मनीषा खत्री यांनी सोमवारी खाते प्रमुखांची बैठक घेतली या बैठकीत त्यांनी हे आदेश दिले आहेत. गेल्या वर्षी 587 कोटी 94 लाख रुपये असून चालू वर्षाची मागणी 206 कोटी असे एकूण 794 कोटी रुपयांच्या वसुलीचे दायित्व आहे त्यातील गेल्या मागणी पैकी 102 कोटी 50 लाख आणि चालू वर्षाच्या मागणीपोटी 114 कोटी 50 लाख असे एकूण 217 कोटी रुपयांची वसुली झाली आहे. म्हणजेच अजूनही सुमारे 500 कोटी रुपयांची वसुली करणे बाकी आहे त्यामुळे या थकीत रकमेच्या वसुलीसाठी जप्ती करण्याचे आदेश देण्यात आले आहेत
