राष्ट्रवादीचे प्रदेशाध्यक्ष पद दिले जाण्याची शक्यता
नाशिक : राष्ट्रवादीचे हेविवेट समजले जाणारे नेते छगन भुजबळ यांचा मंत्रिमंडळात स्थान निश्चित मानले जात असतानाच अचानक भुजबळ यांना डावलण्यात आल्याने राजकीय वर्तुळात चर्चेला उधाण आले आहे. यामुळे भुजबळ समर्थक प्रचंड आक्रमक झाल्याचे चित्र झाले आहे. दरम्यान येवला मतदारसंघातील कार्यकर्ते आक्रमक झाले असून समर्थकांनी मेळावा आयोजित केला आहे. छगन भुजबळ यांनी नाशिकच्या दृष्टीकोनातुन अनेक विकासकामे केली. विमानतळ, नाशिक मुंबई रस्ता, बोटक्लब अशी मोठी विकासकामे भुजबळांच्या काळात झाली. छगन भुजबळ हे आक्रमक नेते म्हणून परिचित आहेत. मंडळ आयोगावरून त्यांनी शिवसेनेसोबत पंगा घेतला आणि शिवसेना सोडत कॉग्रेस पक्षात प्रवेश केला. समता परिषदेच्या माध्यमातून ओबीसी समाजासाठी मोठा लढा उभारण्यात त्यांचा सिहाचा वाटा आहे. अलीकडेच राज्यात मराठा समाजाला आरक्षण देताना ओबीसी समाजावर अन्याय होता कामा नये ही भुजबळांची भूमिका राज्यकर्त्यांनाही चांगल्यापैकी उपयुक्त ठरली त्याचबरोबर मंत्रिपदावर व सरकार मध्ये राहून देखील छगन भुजबळ यांनी मराठा समाजाचे आंदोलक मनोज जरांगे पाटील यांना थेट अंगावर घेत आपली भूमिका स्पष्ट केली. भुजबळांनी उपमुख्यमंत्रीपदापासून अनेक महत्वाची पदे भूषविल्याने त्यांचा दांडगा अनुभव पहाता त्यांचे मंत्रिपद निश्चित मानले जात होते. नाशिक जिल्ह्यातून नरहरी झिरवाळ आणि अँड माणिकराव कोकाटे यांना संधी देत भुजबळ यांना बाजूला सारण्यात आले मात्र भुजबळ यांना का डावलण्यात आले हे अस्पष्ट असून आगामी सिहस्थ बघता नाशिक जिल्ह्याच्या पालकमंत्रीपदी गिरीश महाजन यांना नियुक्ती करताना छगन भुजबळ हे अडचणीचे ठरू शकतात व भुजबळ हे पालकमंत्रीपदावर दावा ठोकण्याची शक्यता लक्षात घेता हा संघर्ष टाळण्यासाठी व गिरीश महाजन यांचा रस्ता मोकळा ठेवण्यासाठीच छगन भुजबळ यांना मंत्रिपदापासून लांब ठेवण्याची खेळी भाजपने राष्ट्रवादीच्या माध्यमातून खेळल्याची चर्चा आहे तर दुसरीकडे अजित पवार गट राष्ट्रवादीच्या प्रदेशाध्यक्षपदी भुजबळ यांची नियुक्ती करून पक्षाची मोठी जबाबदारी देण्याची शक्यता आहे. भुजबळांसाठी राज्यसभा हा पर्याय देखील पक्ष ठेऊ शकतो मात्र छगन भुजबळ यावर काय प्रतिसाद देतात अथवा काय भूमिका घेतात याकडे भुजबळ समर्थकांसह सर्वांचे लक्ष लागून आहे.
