जॉगिंगट्रॅक लगत एमडी ड्रग्जचे जाळे असल्याची चर्चा
नाशिक : शहरातील साईनाथनगर चौफुलीलगत जॉगिंग ट्रॅक येथे एमडी ड्रग्ज प्रकरणात मोठी कारवाई करण्यात गुन्हे शाखेच्या अमली पदार्थविरोधी पथकाला मोठे यश आले आहे. गेल्या दोन ते तीन वर्षांपासून एमडी ड्रग्ज प्रकरणी नाशिकचे नाव चर्चेत आहेत .एमडी ड्रग्जचा मास्टरमाइंड ललित पाटील हा गजाआड असून नाशिकच्या शिंदे गावात एमडीसारख्या कुख्यात ड्रग्जचे कारखाने बिनबोभाट सुरू असल्याचे आढळल्याने नाशिक नशेचं नवं डेस्टिनेशन बनल्याचे धक्कादायक वास्तव समोर आले होते.यादरम्यान पोलिसांनी कोट्यवधी रुपयांचे ड्रग्ज जप्त केले होते. त्याचबरोबर इंदिरानगर परिसरातील वडाळा गावातील छोटी भाभी कनेक्शन देखील समोर आल्याने मोठी खळबळ उडाली होती. काही महिन्यांपूर्वी वडाळागावात छोटी भाभी उर्फ नसरीन शेख हिचा एमडी ड्रग्जचा अड्डा उध्वस्त केला होता या प्रकरणात संशयित चिपड्या उर्फ इरफान नूर मोहम्मद शेख (30 रा वडाळागाव) यास अटक केली होती. यादरम्यान चिपड्यावर राजकीय वरदस्त असल्याची जोरदार चर्चा होती. विधानसभेच्या निवडणुकीत देखील या मुद्यांवर आक्रमक प्रचार करण्यात आला होता. मिळालेल्या माहितीनुसार गुन्हे शाखेचे अमली पदार्थविरोधी पथकाचे ताजने यांना गुप्त माहिती मिळाली होती की इंदिरानगर परिसरातील साईनाथनगर चौफुलीलगत जॉगिंग ट्रॅकमध्ये काही व्यक्ती एमडी ड्रग्ज विक्रीसाठी येणार आहेत त्यानुसार गुन्हे शाखेच्या अमली पदार्थविरोधी पथकाने भल्या पहाटे तीन वाजेच्या सुमारास सापळा रचला या सापळ्यात अजय भिका रायकर (34) अल्ताफ पिरण शहा (35) मोसीन हनिफ शेख (36) तिघेही राहणार म्हाडा बिल्डिंग वडाळा गाव त्याचबरोबर आकर्षन रमेश श्रीश्रीमाळ(30) राहणार तारवाला नगर यांना ताब्यात घेतले असता त्यांच्याकडून तीन लाख रुपये किमतीचे 61.5 ग्रॅम एमडी जप्त करण्यात आले. त्याचबरोबर दोन मोबाईल देखील हस्तगत करण्यात आले आहेत मुख्य म्हणजे दोन ते तीन वर्षांपासून एमडी ड्रग्जची चर्चा असताना आज देखील इंदिरानगर जॉगिंग ट्रॅक परिसरात कॅफे, हॉटेल, पानटपऱ्या या ठिकाणी अनेक तरुण-तरुणींचे घोळके असतात या कॅफेनमध्ये सिगारेटच्या धुरांच्या झुरक्या आड एमडी ड्रग्जचे व्यवहार होत असल्याची चर्चा खुद्द वडाळागावात होत असून सुरवातीच्या काळात पोलिसांनी लक्ष घालत या कॅफेचालकांना समज दिली होती मात्र त्यानंतर पुन्हा असे प्रकार इंदिरानगर पोलीस ठाण्याच्या हद्दीत सुरू असल्याची चर्चा परिसरात असून यासाठी लगत असलेल्या सायकल ट्रॅकचा वापर होत असल्याचे समजते.
