देवयानी फरांदे, अँड राहुल ढिकले, सीमा हिरे विजयी
नाशिक : विधानसभेच्या निवडणुकीच्या निकालात भाजपच्या तीनही आमदारांनी आपला गड राखत पुन्हा एकदा विजय मिळवल्याने नाशकात पुन्हा एकदा कमळ फुलले आहे. नाशिकमध्ये पूर्व मतदारसंघात अँड राहुल ढिकले तर मध्य नाशिक मतदारसंघात देवयानी फरांदे तर पश्चिम मतदारसंघात सीमा हिरे या भारतीय जनता पार्टीच्या उमेदवारांनी पुन्हा एकदा विजयाचा गुलाल उधळला आहे . नाशिक मध्य विधानसभेची निवडणूक आरोप-प्रत्यारोपाणे गाजली असताना अत्यंत चुरशीच्या झालेल्या निवडणुकीत भाजपच्या विद्यमान आमदार देवयानी फरांदे यांनी इतिहास रचला असून फरांदे यांनी सलग तिसऱ्यांदा विजय मिळवत हॅट्रिक साधली आहे.त्यांनी ठाकरे गटाच्या शिवसेनेचे उमेदवार वसंत गीते यांचा 17,856 मतांच्या फरकाने पराभव केला. तर नाशिक पश्चिम मतदारसंघात भाजप महायुतीच्या विद्यमान आमदार सीमा हिरे यांनी हॅट्रिक साधत मोठे मताधिक्य घेत पुन्हा एकदा आपल्या मतदारसंघात कमळ फुलवले आहे.हिरे यांनी तब्बल 68 हजार 177 मतांनी विजश्री खेचून आणली. याठिकाणी महाराष्ट्र नवनिर्माण सेनेचे दिनकर पाटील आणि ठाकरे गटाच्या शिवसेनेचे सुधाकर बडगुजर यांचा पराभव केला आहे. अवघ्या नाशिक जिल्ह्याचे लक्ष लागून राहिलेल्या नाशिक पूर्व मतदारसंघात भाजपचे उमेदवार व विद्यमान आमदार अँड राहुल ढिकले यांचा दणदणीत विजय झाला असून त्यांनी दुसऱ्यांदा आमदार होण्याचा बहुमान मिळवला असून प्रतिस्पर्धी असलेले शरद पवार गटाच्या राष्ट्रवादीचे उमेदवार गणेश गीते यांना धूळ चारत 87 हजार 535 इतक्या मतांनी विजय मिळविला .यावेळी भाजप महायुतीच्या कार्यकर्त्यांनी पेढे वाटत, फटाके वाजवत आनंद व्यक्त केला.
