उद्याच्या जाहीर सभेत इतर पक्षांचे नेते प्रवेश करण्याची शक्यता
नाशिक : विधानसभा निवडणुकीचे रण नाशिक शहरात जोरदार तापत असून पंतप्रधान नरेंद्र मोदी, राष्ट्रवादी कॉग्रेसचे अध्यक्ष शरद पवार यांच्या जाहीर सभेनंतर शुक्रवारी (दि 15) ठाकरे गटाच्या शिवसेनेची सभा होणार आहे. विधानसभा निवडणुकीला जेमतेम पाच दिवसांचा कालावधी उरलेला आहे. त्यामुळे सर्वच पक्ष आपल्या स्टार प्रचारकांची सभा ठेवत आहेत त्यामुळे आरोप-प्रत्यारोपामुळे प्रचारात रंगत आली आहे. पंतप्रधान नरेंद्र मोदी यांच्या सभेला नाशिककरांनी मोठी गर्दी केली होती तर शरद पवार यांनी एकाच दिवसात सहा मतदारसंघानमध्ये सभा घेत विरोधकांच्या नाकी-नऊ आणले तर शुक्रवारी उबाठा शिवसेनेची जाहीर सभा होत असून सभेला पक्ष प्रमुख उद्धव ठाकरे मार्गदर्शन करणार आहेत. ही सभा सायंकाळी 6 वाजता हुतात्मा अनंत कान्हेरे मैदानावर होत असून या सभेत इतर पक्षांना मोठे धक्के देण्याची रणनीती आखण्यात आली असून याचे नियोजन ठाकरे गटाकडून सुरू आहे. मिळालेल्या माहितीनुसार महाराष्ट्र नवनिर्माण सेनेचे दोन प्रमुख नेते या सभेत ठाकरे गटाच्या शिवसेनेत जाहीर प्रवेश करणार असल्याचे समजते यामध्ये माजी महापौर यांचा समावेश असल्याचे कळते आहे.
