वैद्यकीय शिक्षण घेणाऱ्या विध्यार्थ्यांचा रशियात मृत्यू
नाशिकरोड : नाशिकच्या जेलरोड येथील रहिवासी अभिषेक जाधव हा रशियामध्ये शिक्षणासाठी वास्तव्यास होता. काल झालेल्या अपघातात अभिषेक गंभीर जखमी झाला होता यामध्ये त्याचा मृत्यू झाल्याने नाशिक शहरात हळहळ व्यक्त होत आहे. अभिषेक युवराज जाधव ( 21,रा. नारायण बापूनगर) हा रशियामध्ये वैद्यकीय शिक्षणासाठी वास्तव्यास होता. एमबीबीएसच्या तिसऱ्या वर्षात तो शिक्षण घेत होता. अभिषेक काही दिवसांपूर्वी गणेशोत्सवासाठी राहत्या घरी जेलरोडला आला होता. दोन दिवसांपूर्वी पहाटे तो विमानाने रशियाला गेला. तेथे विमानतळावर उतरल्यानंतर अभिषेक व चार मित्र टॅक्सी करून होस्टेलला जात असताना रस्त्यात बाजूला मोठ्या इमारतीजवळ सुरू असलेला ट्रक अचानक वेगाने रस्त्यावर आला व कारवर आदळल्याने कारचालका शेजारी बसलेला अभिषेक गंभीर जखमी होऊन त्याचा जागीच मृत्यू झाला. यामध्ये त्याचे मित्रही जखमी झाले. हुशार विद्यार्थी म्हणून ख्याती अभिषेकचे शालेय शिक्षण जेलरोडच्या के. एन. केला शाळेत तर बारावीनंतरचे शिक्षण भुजबळ नॉलेज सिटीमध्ये झाले होते. त्याला अभिनयाची, वक्तृत्वाची व क्रिकेटची आवड होती. तो नाटकातही भूमिका करत होता यामध्ये त्याने अभिनयात पारितोषिकही मिळविले होते .त्याचे वडील महापालिकेत नोकरीला आहेत, अभिषेक हा एकुलता एक मुलगा होता. त्याच्या मृत्यूने जाधव कुटूंबावर दुःखाचा मोठा डोगर कोसळला आहे. त्याच्या निधनाने नाशिक शहरात हळहळ व्यक्त होत आहे.
