नाशिकच्या जिल्हा रुग्णालयातील प्रकार
नाशिक : शहरातील जिल्हा शासकीय रुग्णालयातील भोंगळ कारभार नवा नाही. या ना त्या कारणाने जिल्हा रुग्णालय नेहमी चर्चेत असते. काल एका अनोळखी महिलेने बाळंतीण मातेला कपडे व साहित्य आवरा मी बाळाला सांभाळते व परिसरात फिरवून आणते असे सांगून कक्षातून बाहेर पडली ती न परतण्यासाठीच .सटाणा तालुक्यातील रहिवाशी असलेली सुमन अब्दुल सलीम खान ही बाळंतपणासाठी नाशिकच्या जिल्हा रुग्णालयात 28 डिसेंबरला रात्री तिचा पती अब्दुल खान याच्यासोबत जिल्हा रुग्णालयात दाखल झाली होती उपचारानंतर महिलेची प्रसूती होऊन तिने मुलाला जन्म दिला दरम्यान बाळाचे वजन कमी असल्याने नवजात शिशुला विशेष न्यू बॉर्न बेबी कक्षात दाखल करण्यात आले त्याचबरोबर आईला अतिदक्षता विभागात उपचारासाठी ठेवण्यात आली. शनिवारी सकाळच्या सुमारास डिस्चार्ज देण्यात आला यामुळे बाळाला तिच्या वडिलांच्या ताब्यात देण्यात आले व कागदपत्रांवर स्वाक्षरी घेण्यात आली. रुग्णालयाला डिस्चार्ज देण्याची कागदपत्रे प्रक्रिया पूर्ण करण्यात आल्याचे जिल्हा रुग्णालय व्यवस्थापनाने सांगितले साडेअकरा वाजेच्या सुमारास बाळाची आई सुमन खान पुन्हा रडत रुग्णालयात आल्या त्यांनी बाळ हरविल्याची तक्रार येथील रुग्णालयातील कर्मचाऱ्यांकडे केली याबाबत जिल्हा शल्य चिकित्सक डॉक्टर चारुदत्त शिंदे यांनी त्वरित लक्ष घालून घटनेची माहिती पोलिसांना कळविली यादरम्यान जिल्हा रुग्णालय पोलीस प्रशासनाने सीसीटीव्ही फुटेज तपासले असता बाळाची आई सुमन यांनी त्यांच्या तोंड ओळख असलेल्या एका महिलेकडे बाळाला सोपविले असे दिसून आल्याचा दावा रुग्णालय प्रशासनाने केला आहे. मागील तीन दिवसाच्या फुटेज मध्ये अनोळखी महिला तीनही दिवस बाळाला हाताळत असल्याचे दिसून येत आहे. हे सीसीटीव्ही फुटेज पोलिसांनी महिलेला दाखविले असता तिने बाळाला घेऊन जाणाऱ्या महिलेला ओळखले असून ही महिला रुग्णालयात तिच्या पतीच्या तोंड ओळखीची असल्याचे तिने सांगितले.
बाळंतीन महिलेच्या माहितीनुसार संशयित महिला गेल्या चार-पाच दिवसांपासून बाळंतीण महिला व तिच्या पतीच्या संपर्कात होती. माझे नातलग दुसऱ्या वार्डात ऍडमिट असून त्यांची सेवा करण्यासाठी मी येत असते असे सांगत तिने मराठी व हिंदी भाषेचा भडीमार करून बाळंतीन महिलेची ओळख वाढवली. याच ओळखीचा गैरफायदा घेत संशयित महिलेने बाळ हाताळत व विश्वास संपादन करत घात केला मुख्य म्हणजे ती संशयित महिला बाळंतीण महिलेच्या ओळखीची नाही किंवा नातेवाईक देखील नाही. कॅमेऱ्याची तपासणी करण्यात आली असता त्याच्यात महिला चोर जाताना पाठमोरी दिसते. मात्र चेहरा स्पष्ट दिसत नसल्याने पोलिसांनाही ओळख पटविणे अवघड झाले आहे.या धक्कादायक घटनेने जिल्हा रुग्णालय प्रशासन चक्रावून गेले आहे. या प्रकरणात बाळाचा व महिलेचा शोध पोलिसांनी सुरू केला असून सरकारवाडा पोलीस ठाण्यात गुन्हा दाखल करण्यात आला आहे. पोलीस उपायुक्त किरणकुमार चव्हाण, सरकारवाडा पोलीस ठाण्याचे वरिष्ठ पोलीस निरीक्षक सुरेश आव्हाड, गुन्हे शाखा युनिट 1 चे पथक त्या महिलेचा शोध घेत आहेत.
