कंपनीच्या प्रतिनिधीसह भंगार व्यापाऱ्यास अटक
नाशिक : शहरातील कर्मवीर दादासाहेब गायकवाड सभागृहाच्या पाठीमागे असलेल्या नंदिनी नदी पात्रात काही दिवसांपूर्वी दहा ते बारा गोण्यामध्ये जिलेटीनसदृश स्फोटकांचा मोठा साठा आढळून आल्याने शहरात खळबळ उडाली होती. मात्र मुंबई नाका पोलिसांनी काही तासातच या घटनेचा उलगडा करत संबंधितांना अटक करण्यात यश मिळविले. मिळालेल्या माहितीनुसार “चला जाणूया नंदिनी नदीला” या अभियानांतर्गत नदीकाठलगत मनपाच्या उद्यान विभागामार्फत वृक्षलागवड करण्यात आली. या दरम्यान नदीकाठची पाहणी करताना त्यांना जिलेटीनसदृश स्फोटकांचा मोठा साठा नजरेस पडला त्यानंतर घटनेची माहिती पोलिसांना कळविण्यात आली, मुंबई नाका पोलिसांनी घटनास्थळी धाव घेत तत्काळ बॉम्बशोधक-नाशक पथकाला पाचारण केले. त्यानंतर पोलिसांनी गायकवाड सभागृहाच्या पाठीमागील सीसीटीव्ही कॅमेऱ्याचे फुटेज गुन्हे शोध पथकाने तपासण्यास सुरवात केली. या फुटेजमध्ये दिसणाऱ्या संशयास्पद टेम्पोचा मालक यास ताब्यात घेतल्यानंतर केलेल्या चौकशीत महत्वाची माहिती पुढे आली. समृद्धी महामार्ग विकसित करताना अडथळा करणारे दगड, डोंगर फोडण्याचे कंत्राट ठाणे जिल्ह्यातील कसारा येथील एका कंपनीने घेतले होते. त्यासाठी कंपनीने जिलेटिनचा मोठ्या प्रमाणात वापर केला होता. दरम्यान 27 सप्टेंबर रोजी एक जुने मालवाहू कंटेनरची लोखंडी बॉडी कंपनीचे प्रतिनिधी संशयित अशोक कर्डक यांनी भद्रकाली परिसरातील भंगार व्यवसायिक जाकीर हनिफ अत्तार यांना विक्री केली होती. अत्तार यांनी ही बॉडी जेव्हा कामगारांनमार्फत तोडण्याचे काम सुरू केले होते. त्यामध्ये हा साठा मिळून आला होता. त्यांना या स्फोटकांच्या साठा बाबत माहिती नव्हती. त्यांनी तो कंपनीतील काही-तरी कचरा समजून सर्व गोण्या कामगार संशयित दबीर अन्सारी यास विल्हेवाट लावण्यास सांगितले. त्याने टेम्पोचालक रिहान शेख यास भाडे देऊन या सर्व गोण्या त्यामध्ये वाहतूक करत असलेल्या दादासाहेब गायकवाड सभागृहाच्या पाठीमागे नदीपात्रात रात्री आणून टाकल्या होत्या.मुदतबाह्या झालेल्या या स्फोटकाच्या साठ्याची निष्काळजीपणे विल्हेवाट लावल्याप्रकरणी मुंबई नाका पोलिसांनी संबंधित कंपनीच्या अधिकृत प्रतिनिधीसह भंगार व्यावसायिक आणि एका टेम्पोचालकाला अटक केली आहे. पोलिसांनी दिलेल्या माहितीनुसार नंदिनी नदीपात्रात मिळून आलेला जिलेटीनसदृश स्फोटकांचा साठा हा सगळा मुदतबाह्या असून दहशतवादी कृत्य किंवा कुठलाही घातपात करण्याचा यामागे तसा काही उद्देश तपासातून निष्पन्न झालेलं नाही.
