फुलेनगर परिसरात दोन टोळ्या समोरासमोर,कोयते नाचवत एकमेकांवर चाल
नाशिक : शहरात आता गँगवार सुरु झाल्याचे चित्र असून काही दिवसांपूर्वी जय भवानी रोड परिसरातील फर्नांडिस वाडी या भागात वर्चस्ववाद आणि हप्तेवसुलीतुन वाद होऊन दोन गॅंग आमने-सामने आल्या यावेळी एकमेकांनवर गोळीबार करण्यात आल्याची घटना नुकतीच घडली असताना काल पंचवटी परिसरातील पेठरोड भागातील फुलेनगर येथे दोन गट आमने-सामने आल्यानंतर या टोळक्यांनी हातात धारदार कोयते नाचवत एकमेकांवर चाल करत आरडाओरडा करत शिवीगाळ करून दहशत माजविण्याचा प्रयत्न केला मात्र पोलिसांनी वेळीच धाव घेतल्याने पुढील अनर्थ टळला. मिळालेल्या माहितीनुसार फुलेनगर परिसरात दोन गटात वाद झाले त्यानंतर दोन्ही गटाच्या भाईंनी एकमेकांवर कोयते उगारले.फक्त आणि फक्त वर्चस्ववादातून दोन्ही टोळके समोरासमोर आल्याची माहिती मिळत आहे. मुख्य म्हणजे हे संशयित गुन्हेगारी पार्श्वभूमीचे असून, खून, मारहाण असे गंभीर स्वरूपाचे गुन्हे त्यांच्यावर दाखल आहेत. पोलीस वेळीच घटनास्थळी पोहचल्याने मोठा अनर्थ टळला असून ,परिसरातील नागरिकांमध्ये दहशतीचे वातावरण आहे. नाशिक शहरात आता गुन्हेगारी पार्श्वभूमी असलेले टोळके पोलिसांना आवाहन देत असल्याची चर्चा शहरात सुरू आहे. या टोळक्यांचा वेळीच बिमोड करण्याची मागणी जोर धरू लागली असून येत्या काळात महानगरपालिका निवडणूका व कुंभमेळा जवळ येत असल्याने पोलीस या टोळक्यांचा कसा बंदोबस्त करतात याकडे नागरिकांचे लक्ष लागून आहे.
