पोलीस आयुक्त संदीप कर्णिक यांचे आदेश
नाशिक : रंगपंचमीच्या दिवशी शहरातील बोधलेनगर जवळ असलेल्या आंबेडकरवाडीत दोन टोळ्यांच्या वर्चस्ववादातून प्रशांत भगवान जाधव व उमेश भगवान जाधव या दोन सख्या भावांची टोळक्याने निर्घृणपणे धारदार शस्त्राने वार केले होते. गंभीर जखमी होऊन झालेल्या रक्तस्त्रावामुळे दोघांचाही रुग्णालयात नेताना मृत्यू झाला होता.
यामध्ये संशयित आरोपी सागर मधुकर गरड (32) योगेश चंद्रकांत रोकडे (30)अनिल विष्णू रेडेकर (40)सचिन विष्णू रेडेकर (44)अविनाश उर्फ सोनू नानाजी उशीरे (26)यांना खुनाच्या गुन्ह्यात पोलिसांनी बेड्या ठोकल्या होत्या. पूर्ववैमनस्यातून व परिसरातील वर्चस्ववादातून हे हत्याकांड झाल्याचे पोलिसांच्या तपासातून प्रथमदर्शनी समोर आले होते. मात्र तपासात काही त्रुटी ठेवण्यात आल्या असून तपासात हलगर्जीपणा केला जात असल्याचा तक्रारी आयुक्तालयापर्यंत पोहचल्या नंतर या खुनाच्या गुन्ह्याचा सखोल तपासाकरिता पोलीस आयुक्त संदीप कर्णिक यांच्या आदेशानुसार स्वतंत्र स्थानिक एसआयटी म्हणजेच विशेष पथक स्थापन करण्यात आले. या पथकाचे प्रमुख म्हणून गुन्हे शाखेचे सहायक पोलिस आयुक्त संदीप मिटके यांच्याकडे जबाबदारी सोपविण्यात आली या पथकात विशेष शाखेचे पोलीस निरीक्षक अंकुश चिंतामण, उपनगर पोलीस स्टेशनचे उपनिरीक्षक किरण शेवाळे, नाशिकरोड पोलीस स्टेशनचे अजित शिंदे, अंमलदार सचिन वाळुंज, रवी शितोळे आदींचा समावेश करण्यात आला आहे . 15 दिवसांनंतर एस आयटी स्थापनेचा आयुक्तालयाने निर्णय घेतला असून गुन्हे शाखेचे उपायुक्त प्रशांत बच्छाव यांच्या पर्यवेक्षणाखाली पथक दुहेरी हत्याकांडाचा सखोल तपास करणार असून तपासाच्या प्रगतीबाबत वेळोवेळी आयुक्तांना पथकप्रमुख माहिती देणार आहेत.
