तब्बल तीन दिवसानंतर या घटनेची वाच्यता
नाशिक : विधानसभा निवडणूका घोषित होण्यासाठी अवघे काही महिने शिल्लक असताना नाशिक येथील जेलरोड परिसरात राजकीय पक्षाच्या नेत्याकडून गोळीबार झाल्याने व मुख्य म्हणजे या प्रकरणाची वाच्यता तीन दिवसांनंतर झाल्याने राजकीय क्षेत्रात खळबळ उडाली आहे. मिळालेल्या माहितीनुसार जेलरोड येथील मॉडेल कॉलनीत असलेल्या वसंत विहार कला व क्रीडा मित्रमंडळातर्फे नवरात्रोत्सव साजरा करण्यात येतो. या मंडळाचे संस्थापक अध्यक्ष नितीन बर्वे आहेत. मात्र यावर्षी नवरात्रोत्सव अध्यक्षपदी सुयोग गुंजाळ यांची निवड करण्यात आली आहे. काही दिवसांपूर्वी म्हणजेच रविवारी रात्री 10 वाजेच्या सुमारास मॉडेल कॉलनीत सुयोग गुंजाळ उभा असताना त्याला नितीन बर्वे यांचा फोन आला यावेळी फोनवर सुयोग गुंजाळ म्हणाला मी नवरात्रोत्सवाची तयारी करण्यासाठी धावपळ करत आहे, तुम्ही कोठे आहात, अशी विचारणा केली असता नितीन याने सुयोग गुंजाळ याला सांगितले की मी संतोष पिल्ले यांच्यासोबत असून नवरात्रोत्सवाच्या देणगीची बोलणी करत असल्याचे सांगितले. त्यावेळी सुयोग गुंजाळ म्हणाला तो उडत गेला, मला नको अध्यक्षपद, नाही करायची नवरात्र असे फोनवरून संतापात सांगितले याच कारणावरून वादाची ठिणगी पडली. त्यानंतर रात्रीच्या सुमारास सुयोग गुंजाळ घराबाहेर उभा असताना कारमध्ये संतोष पिल्ले, नितीन बर्वे, आणि अजून दोन साथीदार तेथे आले त्यांनी सुयोगला गाडीत बसण्यास सांगितले मात्र सुयोगने नकार दिल्याने ते सर्वजण पुन्हा नवरात्रोत्सवाच्या जागेवर गेले. तर सुयोग घराच्या दिशेने निघून गेला काही वेळातच सुयोगला फोन आला संतोष पिल्ले याने बंदुकीतून फायरिंग केली आहे, तू इकडे येऊ नको. या घटनेने घाबरलेल्या सुयोगने नाशिकरोड पोलीस ठाणे गाठत फिर्याद दिली. तीन दिवसांनी या घटनेची वाच्यता झाल्याने पोलीस खडबडून जागे झाले असून यामध्ये एकास अटक करण्यात आली आहे तर उर्वरित संशयितांनाचा नाशिकरोड पोलीस शोध घेत आहेत. गोळीबार गावठी कट्टा की एअरगनमधून ? दरम्यान गोळीबाराची जोरदार चर्चा परिसरात सुरू असून नेमका गोळीबार गावठी कट्यातून झाला की एअरगणमधून याचीच चर्चा सुरू असून संशयीत पोलिसांच्या ताब्यात आल्यानंतरच या घटनेचा उलगडा होणार आहे मात्र यामध्ये राजकीय पक्षाच्या पदाधिकाऱ्याचे नाव आल्याने परिसरात खळबळ उडाली आहे.
