मुंब्रा ते वडाळागाव ड्रग्ज कनेक्शन आले समोर
नाशिक : काही महिन्यांपूर्वी ड्रग्ज प्रकरणात नाशिकचे नाव देशात गाजले होते. कारण या ड्रग्ज प्रकरणातील मुख्य सूत्रधार हा नाशिक येथील होता त्याचबरोबर सामानगाव परिसरातील ड्रग्ज बनवण्याचा कारखाना देखील पोलिसांनी उध्वस्त केला होता. या ड्रग्ज च्या जाळ्यात युवक मोठ्याप्रमाणात अडकलेले आहेत. मुख्य म्हणजे या ड्रग्ज प्रकरणातील सुई नाशिक शहरातील वडाळा गावापर्यंत पोहचली होती. आणि यामध्ये छोटी भाभी उर्फ नसरीन हिला पोलिसांनी बेड्या ठोकल्या होत्या .मात्र आता पुन्हा वडाळागावातील एमडी ड्रग्ज प्रकरण वर्षेभरानंतर चर्चेत आले आहे. या प्रकरणाचा तपास पुढे येत असून यामध्ये वडाळागावातील छोट्या भाभीच्या साथीदारांना गजाआड करण्यात यश आले आहे. काही महिन्यांपूर्वी वडाळागावातील सादिकनगर महेबूबनगर रस्त्यावरील एका टपरित नाशिक गुन्हे शाखेच्या अमली पदार्थविरोधी पथकाने छापा टाकला होता त्यावेळी त्या टपरीतून 1 लाख 89 हजार 260 रुपये किमतीचे 54.4 ग्रॅम एमडी ड्रग्ज जप्त करण्यात आले होते. या कारवाईत नसरीन उर्फ छोटी भाभी व तिचा साथीदार वसीम शेख त्याचबरोबर तिचा पती इम्तियाज उर्फ चिकन्या शेख यालाही अटक करण्यात आली होती. त्यानंतर पुढचा तपास पोलीस यंत्रणा करत असताना अनेकांची नावे या प्रकरणात आली हा तपास मुंबई, ठाणे, मुंब्रा, भिवंडी पर्यंत पोहचला होता. छोटी भाभीला एमडी ड्रग्ज पुरवणारा सलमान शकील फालके याला पोलिसांनी मुंब्रा मधून अटक केली होती. आणि आज छोटी भाभीला एमडी ड्रग्ज प्रकरणात मदत केल्याच्या आरोपाखाली संशयीत इरफान नूरमोहम्मद शेख (41,रा वडाळा गाव) व करणं सोनटक्के (रा नाशिकरोड) या दोघांना पोलिसांनी अटक केली आहे. मुख्य म्हणजे त्यावेळी छोटी भाभी मोठ्या भाभी बरोबर संबंधित असल्याची चर्चा नाशिकच्या राजकारणात जोरात सुरू होती. मात्र इरफान हा एका आमदाराच्या जवळचा असल्याच्या नव्या चर्चेला तोंड फुटले आहे . मुख्य म्हणजे वडाळा गावात ड्रग्ज आपली पाळेमुळे पसरवत असताना या भागातील धर्मगुरू व जेष्ठ नागरिक व तरुणांनी एकत्र येत या ड्रग्जच्या विरोधात जनजागृती करत रॅली देखील काढली होती. त्याचबरोबर पोलीस आयुक्तांची भेट घेत महत्वाची माहिती दिली असताना देखील कारवाई होत नसल्यामुळे इंदिरानगर पोलीस संशयाच्या भोवऱ्यात सापडले होते .कारण इतक्या वर्षांपासून छोटी भाभी या ठिकाणी ड्रग्ज विक्री करत असताना कारवाई होत नव्हती मग या छोट्या भाभीला आशीर्वाद व पाठींबा कुणाचा होता याचीच चर्चा वडाळगावात आजदेखील सुरू आहे.
