किरकोळ कारणातून अल्पवयीन विद्यार्थ्यांची हत्या
नाशिक : शहरात गुन्हेगारीमध्ये मोठ्या प्रमाणात वाढ झालेली असताना आता आपला मुलगा क्लासला गेल्यावर सुरक्षित परत येणार का ? ही काळजी पालकांमध्ये निर्माण झाली असून त्याला कारण देखील तसेच आहे. अगदी किरकोळ कारणातून अल्पवयीन मुलांमध्ये क्लासच्या ठिकाणी वाद झाला. आणि या हाणामारीत एका विद्यार्थ्याला आपला जीव गमवावा लागला. मिळालेल्या माहितीनुसार नाशिक शहरातील सातपूर परिसरात एका खाजगी क्लासमध्ये बेंच पुढे घेण्याच्या कारणातून मनात राग धरून दोघा अल्पवयीन मुलांनी सायंकाळी क्लासच्या बाहेर एकटे गाठत यशराज तुकाराम गांगुर्डे (वय 16) या विद्यार्थ्यांला लाथाबुक्यांनी बेदम मारहाण केली. या मारहाणीत यशचा दुर्देवी मृत्यू झाला. मिळालेल्या माहितीनुसार यशराज हा खाजगी क्लासमध्ये दहावीच्या वर्गात शिकत होता. त्याच्यासोबत शिकणाऱ्या एका विद्यार्थ्यांने 31 जुलै रोजी त्यास वर्गातील बेंच पुढे घेण्यास सांगितले. त्यास त्याने नकार दिला. क्लास सुटल्यानंतर रात्री नऊ वाजेच्या दरम्यान त्या मुलाने व त्याच्या मित्राने यशराज यास हाताच्या चापटीने मारहाण केली होती. तसेच 1 ऑगस्ट ला पुन्हा या दोघां मुलांनी यशराज यांच्यासोबत वाद घातला. 2 ऑगस्ट सायंकाळच्या सुमारास तो क्लासच्या बाहेर उभा असताना त्याच्यावर या दोघा मुलांनी पुन्हा हल्ला चढवत छातीत, बरगड्यांवर लाथाबुक्यांनी बेदम मारहाण केली.यादरम्यान तो रस्त्यात बेशुद्ध अवस्थेत पडल्याची बाब क्लास संचालक म्हस्के यांच्या लक्षात येताच त्यांनी यशराजला दवाखान्यात दाखल केले. डॉक्टरानी तेथून त्यास तत्काळ पुढील उपचारासाठी शासकीय रुग्णालयात दाखल केले.वैद्यकीय अधिकाऱ्यांनी तपासून यशराज यास मयत घोषित केले. मात्र त्याचा मृत्यू कशामुळे झाला याचे नेमके स्पष्ट होत नव्हते. यशराजच्या मूर्तदेहावर कुठल्याही जखमा आढळून आल्या नव्हत्या. शवविच्छेदनात त्याच्या डोक्याला जबर मार लागल्याचे स्पष्ट झाले. त्याचबरोबर खाजगी क्लासच्या बाहेर असलेल्या सीसीटीव्ही फुटेजची तपासणी पोलिसांनी केली असता त्यामध्ये मुलांच्या घोळक्यातून दोघे जण यशराजला लाथाबुक्यांनी मारताना दिसून आले. त्यानंतर तेथील पार्किंगमध्ये तो कोसळल्याचेही फुटेजमध्ये दिसत आहे. यावरुन पोलिसांनी परिसरात राहणाऱ्या दोघा अल्पवयीन बालकांना खुनाच्या गुन्ह्यात ताब्यात घेण्यात आले आहे. रुग्णालयात आक्रोश……….अगदी किरकोळ कारणातून यशराजला आपला जीव गमवावा लागल्याने त्याच्या कुटूंबावर दुःखाचा डोगर कोसळला आहे. घटनेनंतर जिल्हा रुग्णालयात मोठी गर्दी जमली होती. दुपारी त्याचा मूर्तदेह ताब्यात घेण्यात आला. यावेळी आईसह कुटूंबियांनी केलेल्या आक्रोशाने रुग्णालय परिसर सुन्न झाला होता. यावेळी कुटुंबातील व्यक्तींनी पोलिसांनी त्या मुलांवर कठोर कारवाईची मागणी केली असून जरी ते अल्पवयीन असले तरी त्यांना धडा शिकवावा, जेणेकरून अन्य कोणी अल्पवयीन मुले अशा प्रकारे गुन्हेगारीकडे वळणार नाहीत. पोलिसांनी दिलेल्या माहितीनुसार मुलाच्या खुनाच्या गुन्ह्यामध्ये सोळा वर्षीय दोन मुलांना ताब्यात घेण्यात आले असून त्यांना बाल न्याय मंडळापुढे हजर करण्यात आले असता न्यायमंडळाने त्यांची बाल निरीक्षणगृहामध्ये रवानगी केली आहे. याबाबत पोलिसांचा पुढील तपास सुरू असून दोषारोपपत्र न्याय मंडळापुढे सादर करण्यात येणार असल्याची माहिती पोलिसांनी दिली.
