बसचालक दारू पिऊन बस चालवत असल्याचा संतप्त जमावाचा आरोप
नाशिकरोड : पुणे, मुंबई पाठोपाठ आता नाशिक शहरात देखील अपघातांचे प्रकार वाढीस लागल्याने नागरिकांमध्ये चिंता व्यक्त केली जात असतानाच आज नाशिकरोड परिसरातील मालधक्का भागातील गाडेकर मळा परिसरात असलेल्या सिटी लिंक बस डेपोच्या आवारात सिटी लिंक बसने जोरदार धडक दिल्याने झालेल्या अपघातात पाच वर्षांची चिमुरडी जागीच ठार झाली. दरम्यान संतप्त झालेल्या जमावाने बस फोडण्याचा प्रयत्न केला मात्र पोलिसांनी वेळीच हस्तक्षेप केल्याने मोठा अनर्थ टळला .या अपघातात ठार झालेली सानू सागर गवई (वय 5 वर्ष रा मालधक्का परिसर) ही इयत्ता पहिलीत शिकत असून शाळेतून आजोबांसोबत घरी जात असताना सिटी लिंक बस डेपोच्या आवारात MH 15 gv 7719 या क्रमांकाच्या बसने मुलीला जोरदार धडक दिल्याने सानू जागीच ठार झाली. यावेळी संबंधित बस चालक हा दारू पिऊन बस चालवत असल्याचा आरोप परिसरातील संतप्त नागरिकांनी केला. यावेळी बसचालक घटनेनंतर फरार झाल्याने मोठ्या प्रमाणात जमलेल्या जमावाने त्याचा शोध घेण्याचा प्रयत्न करत डेपो यवस्थापनेला धारेवर धरले व त्याला समोर आणण्याची मागणी करत तो दारू पिऊन बस चालवत होता त्यामुळे त्याच्यावर कठोर कारवाईची मागणी जमावाने केली. यादरम्यान या अपघातात ठार झालेल्या चिमुरडीचे कुटूंब अत्यंत गरीब असल्याने त्यांना नुकसान भरपाई देण्याची मागणी रिपब्लिकन सेनेचे कामगार नेते भारत निकम, रामबाबा पठारे यांनी केली. त्याचबरोबर सिटीलिंक बस चालक ज्या पद्धतीने बस चालवतात याबाबत सुद्धा अनेकदा तक्रारी करण्यात आल्या असताना देखील कारवाई शून्य असल्याची चर्चा नागरिकांमध्ये सुरू होती. पुन्हा अश्या दुर्दैवी घटना घडू नये यासाठी या बसचालकावर कठोर कारवाई करण्याची मागणी नागरिकांकडून होत आहे.
