नाशिक :लोकसभेचे रणशिंग फुंकले गेले. आणि नाशिक लोकसभेत रोज उलट-फेर बघायला मिळत होते. सुरवातीला हेमंत गोडसे यांची उमेदवारी नाशिक लोकसभेसाठी पक्की मानली जात असताना, मंत्री छगन भुजबळ यांचे नाव अचानक पुढे आले मात्र भुजबळांचे नाव स्थानिक भाजपा नेत्यांनी नव्हे तर केंद्राच्या नेत्यांनी पुढे आणल्याचे भुजबळ यांनी मीडियाला सांगितले.अमित शहा यांनीच आपले नाव सुचवल्याचे भुजबळ म्हणाले अचानक भुजबळ यांचे नाव पुढे आणण्यात नक्कीच भाजपाची रणनीती असणार यामागे माधव ही त्रिसूत्री काम करणार असल्याची चर्चा होती. “माधव” म्हणजे (मा म्हणजे माळी +ध म्हणजे धनगर+ व म्हणजे वंजारी) असे समीकरण होते. मुख्य म्हणजे हे समीकरण लोकसभेच्या निवडणुकीच्या वेळी भाजपाने राबवले सुद्धा मात्र नाशिक येता-येता “माधव” समीकरणाला मोठा धक्का बसला.बीड मध्ये पंकजा मुंडे आणि परभणीत महादेव जानकर यांना भाजपाने मैदानात उतरवले. पण नाशकात पक्षीय समीकरणे अडचणीचे ठरले. यामुळे छगन भुजबळ यांना उमेदवारी मिळू शकली नाही. भाजपासाठी माधव समीकरण नवे नाही. राष्ट्रीय स्वयंसेवक संघाच्या वसंतराव भागवत यांनी राज्यात माधव पॅटर्न साठी पुढाकार घेतला आणि बहुजन समाजातील वेगवेगळ्या नेत्यांना एकत्र आणण्यात ते यशस्वी झाले. वंजारी समाजाचे गोपीनाथ मुंडे, धनगर समाजाचे अण्णा डांगे, माळी समाजाचे ना. स. फरांदे हे नेतृत्व पुढे आले आणि पुढे भाजपा हा ओबीसींचा पक्ष म्हणून ओळखला जाऊ लागला. पुढे गोपीनाथ मुंडे यांचे अपघाती निधन झाले आणि महाराष्ट्राची सूत्रे देवेंद्र फडणवीस यांच्या हातात आली यानंतर सुद्धा पंकजा मुंडे, गिरीश महाजन, चंद्रशेखर बावनकुळे, संजय कुटे यासारखे दिगग्ज ओबीसी नेते तयार झालेत. मात्र आज नाशिकमध्ये “मा” ला न्याय न मिळाल्याने महाराष्ट्रातील त्याचबरोबर नाशिक जिल्ह्यातील माळी समाजात प्रचंड अस्वस्थता दिसत आहे. मतांच्या गोळा बेरजेसाठी भुजबळांसारख्या ओबीसी नेत्यांचा वापर गेला गेल्याचा राग ओबीसी समाजात आहे. छगन भुजबळ यांच्या माघारीनंतर राज्यातील ओबीसी समाजात प्रचंड आक्रोश असल्याचे समजते. अनेक ठिकाणी मेळावे, बैठका देखील घेण्यात आल्या. त्याचबरोबर नाशिक लोकसभा मतदारसंघात माळी समाजाचे मतदान 1 लाख 40 हजार इतके असल्याची माहिती मिळते आहे. तर ओबीसी समाजाचे मतदान हे निर्णायक ठरणार आहे. महायुतीला “माधव” समीकरण राखण्यात यश येईल अथवा हे मतदान महाआघाडीच्या पारड्यात पडते ते निकालाच्या दिवशीच कळेल.
