तर मी जाहीर माफी मागायला तयार
नाशिक : मध्ये राजकीय घडामोडींना वेग आला असून काल ओझर विमानतळ परिसरात गोकुळ गीते यांच्याबरोबर मंत्री गिरीश महाजन,उदय सामंत,दादा भुसे यांनी चर्चा केली. मात्र तरीदेखील गोकुळ गीते हे निवडणूक लढण्यावर ठाम राहिले. त्यानंतर मात्र आज महायुतीचे उमेदवार नरेंद्र दराडे यांचे बंधू आमदार किशोर दराडे यांनी गणेश गिते यांच्या घरी जाऊन बंद दाराआड चर्चा केली. गणेश गीते आणि किशोर दराडे या दोघांमध्ये साधारण तासाभरापासून अधिक काळ बंद दाराआड खलबतं सुरू होती. यानंतर किशोर दराडे यांनी मीडिया बरोबर संवाद साधला.यावेळी ते म्हणाले दिपालीताई गीते या आमच्या मतदार आहेत. मी महायुतीचे उमेदवार नरेंद्र दराडे यांच्यासाठी त्यांच्याकडे मत मागण्यासाठी आलो होतो. त्यांनी मला स्पष्ट शब्दांत सांगितले आहे की, त्या युतीचा धर्म पाळणार असून महायुतीसोबतच राहतील. गणेश भाऊ देखील निवडणुकीच्या स्पर्धेत होते आणि उमेदवारी मागत होते. ही जागा भाजपला जाणार की शिवसेनेला, हे आधी स्पष्ट नव्हते. आता नियमाने ही जागा शिवसेना शिंदे गटाला सुटली असल्याने आम्ही प्रचाराला सुरुवात केली आहे.त्याचबरोबर गोकुळ गिते हे माझे छोटे भाऊ आहेत. मी त्यांचीही भेट घेणार असून महायुतीचे उमेदवार नरेंद्र दराडे यांना मदत करावी, अशी विनंती त्यांना करणार आहे. शेवटी पाठिंबा देण्याचा निर्णय ते स्वतः घेतील, असेही किशोर दराडे यांनी म्हटले. वादग्रस्त व्हिडिओ आणि ऑडिओ क्लिपवर प्रतिक्रिया काही दिवसांत व्हायरल झालेल्या व्हिडीओ आणि ऑडिओ क्लिपवर किशोर दराडे यांनी बाजू मांडली. या व्हिडीओबाबत बोलताना ते म्हणाले, मराठी भाषा ही जशी वाकवू तशी वाकते. मी ते सहज बोललो होतो, आमचे ट्युनिंग तसे आहे. पण कोणीतरी अनवधानाने ते व्हायरल केले. यात गोकुळ गिते यांचा काहीही संबंध नाही. राजकारणात कोणीतरी विरोधक असतात, जे आपसात लावून देण्याचे काम करतात. माझा पुतण्या सुशिक्षित आहे, तो असे बोललेला नाही. त्याने माध्यमांना आधीच स्पष्ट केले आहे की, ती क्लिप फॉरेन्सिक लॅबला पाठवा. जर तो माझा किंवा आमच्या घरातील कोणाचा आवाज असेल आणि आमच्याकडून काही चूक झाली असेल, तर मी जाहीर माफी मागायला तयार आहे,” असे दराडे यांनी म्हटले.
