मीच पीडितेला घरी नेऊन नमाजचे प्रशिक्षण दिले
नाशिक : देशभरात खळबळ उडवून देणार्या TCS कंपनीतील धर्मांतर आणि लैंगिक शोषण प्रकरणाला आता नवं वळण मिळाल्याचे चित्र असून या प्रकरणातील मुख्य आरोपी निदा खानला पोलिसांनी अटक केली होती. त्यानंतर चौकशीमध्ये तिने अनेक खळबळजनक खुलासे केले आहे. निदा खानने ‘हो, मीच नमाजचे ट्रेनिंग दिले!’ अशी कबुली दिली आहे. पोलीस चौकशीमध्ये निदाने मान्य केले आहे की तीच पीडितेला आपल्या घरी नेऊन नमाज पढण करायला शिकवत असे. पोलिसांना मोबाईलमधून ३७ इस्लामिक ऑडिओ क्लिप्स आणि ॲप्स सापडले आहेत, जे पीडितेच्या फोनमध्ये जबरदस्तीने इन्स्टॉल करण्यात आले होते. आरोपींनी पोलीस तपासात हेही उघड केले आहे की, TCS कार्यालयाच्या ७ व्या मजल्यावरील कॅफे या कटाचा मुख्य अड्डा होता. इथेच बसून दानिश, निदा आणि तौसीफ पीडितेच्या धर्मांतराचा संपूर्ण कट रचत असत.नाशिक TCS धर्मांतर प्रकरणात पीडितेने पोलिसांना दिलेल्या अधिकृत जबाबात आणखी एक दावा केला आहे. पीडितेच्या म्हणण्यानुसार, आरोपी तौसीफ अत्तारने तिच्या वैयक्तिक परिस्थितीचा फायदा घेण्याचा प्रयत्न करत तिला म्हटले होते की, “तुला मूल होत नाहीये, मी तुला अजमेरच्या एका मौलवीचा मोबाईल नंबर देतो. तिथे जाऊन आल्यावर तुला गॅरंटीने मूल होईल.” पोलीस आता या अजमेर अँगल आणि मौलवीच्या कनेक्शनचाही सखोल तपास करत आहेत. निदा खान स्वतः पोलीस पथकाला आपल्या घरी घेऊन गेली आणि तिने ती खोली व तो कोपराही दाखवला, जिथे ती पीडितेला बोलावून नमाज पढणाचे रीतसर प्रशिक्षण देत असे.पोलिसांना या प्रकरणात भक्कम डिजिटल आणि तांत्रिक पुरावे हाती लागले आहेत. पीडितेच्या मोबाईलच्या फॉरेन्सिक तपासणीदरम्यान इस्लाम धर्माशी संबंधित एकूण ३७ ऑडिओ क्लिप्स जप्त करण्यात आल्या आहेत. याशिवाय, मोबाईलमध्ये अनेक यूट्यूब लिंक्स आणि मुस्लिम धर्माशी संबंधित ४ विशेष मोबाईल ॲप्सही आढळले आहेत. पोलीस तपासात हे स्पष्ट झाले आहे की, हे सर्व ॲप्स आरोपी दानिश आणि निदा यांच्या सांगण्यावरूनच पीडितेच्या फोनमध्ये इन्स्टॉल करण्यात आले होते.निदा खानच्या या थेट कबुलीमुळे हे प्रकरण केवळ लैंगिक छळापुरते मर्यादित नसून, यामागे एक मोठे संघटित धर्मांतर रॅकेट कार्यरत असण्याची शक्यता वर्तवली जात आहे. पीडित तरुणीवर नेमका कसा दबाव आणला गेला? या कटात कंपनीतील किंवा बाहेरील आणखी किती लोकांचा सहभाग आहे? याचा सखोल तपास आता पोलीस करत आहेत.
