शिंदे गटाच्या शिवसेनेची डोकेदुखी वाढणार
नाशिक : महापालिका निवडणुकीनंतर शहरातील राजकारणात काय घडेल याचा नेम नाही ? विकासाच्या नावाखाली कोण कोणाला पाठिंबा देईल हे सांगता येणे देखील अवघड झाले आहे. यामुळे प्रत्येक पक्षात नाराजी नाट्य घडत आहे. अशा नाराजीतून जन्म झालेल्या शिंदे गटाच्या शिवसेनेत देखील अंतर्गत नाराजी मोठ्या प्रमाणात दिसून येत आहे. मुख्य म्हणजे शिंदे गटाच्या शिवसेनेला उपमहापौर पद देण्यावरून खरंतर भाजपात वाद होणे अपेक्षित होते. मात्र या उलटे शिंदे गटाच्या शिवसेनेत वाद सुरू झाले. सुरवातीच्या काळात ठाकरेंच्या शिवसेनेतून बाहेर पडल्यानंतर नासिकमध्ये एकनाथ शिंदे यांच्या शिवसेनेत प्रवेश करणारे पहिले नगरसेवक म्हणून प्रवीण तिदमे यांची ओळख आहे. मात्र आज नाराजी नाट्यातून प्रवीण तिदमे हेच नगरसेवक आणि महानगर प्रमुख पदाचा राजीनामा देण्यासाठी निघाले आहेत. याला कारण ठरले आहे ते उपमहापौरपद. विलास शिंदे यांच्यासह प्रवीण तिदमे व राहुल दिवे यांनी उपमहापौर पदासाठी अर्ज भरले होते मूळचे त्र्यंबकेश्वर येथील असलेले प्रवीण तिदमे यांनी सिडको परिसरात बाजी मारत चुंबळेसारख्या मातब्बर कुटुंबाचा पराभव केल्याने ते या पदाचे दावेदार मानले जात होते. मात्र काही दिवसांपूर्वी आलेले विलास शिंदे यांना उपमहापौर पदाची लॉटरी लागल्याने प्रवीण तिदमे यांचा संताप झाला. यादरम्यान प्रवीण तिदमे यांनी गटनेते अजय बोरस्ते व उपमहापौर विलास शिंदे यांच्यावर जहरी टीका करत नगरसेवकपद व महानगर प्रमुख पदाचा राजीनामा देणार असल्याचा इशारा दिला.मुळातच शिंदे गटाच्या शिवसेनेत समन्वय नाही. पक्षाचे संघटन वाढवण्याचे सोडून प्रत्येक नेता हा आपल्या फायद्याचा विचार करत असल्याची चर्चा खुद्द कार्यकर्त्यांमध्ये आहे.यामुळे सामान्य कार्यकर्ते शिंदे गटाच्या शिवसेनेत बाजूला पडत चालले आहेत. याचे उदाहरण द्यायचे झाले तर सुरुवातीपासून बरोबर असलेल्या नाडे नावाच्या कार्यकर्त्याला तिकीट नाकारण्यात आले होते. त्याचप्रमाणे इतर पक्षातील कार्यकर्ते शिंदे गटांच्या शिवसेनेत येण्यासाठी अतुर असताना देखील तुम्ही कुठल्या पक्षाचे आहात याची विचारणा केली जात असल्याने कधीही कुठल्या पक्षात काम न केलेल्या तरुणांमध्ये यामुळे नाराजी वाढत चालली आहे. मुख्य म्हणजे अजय बोरस्ते शिंदे गटाच्या शिवसेनेत आल्यानंतर त्यांच्यावर पदांची बरसात झाली हे देखील मान्य करावे लागेल त्याचबरोबर विलास शिंदे अलीकडेच पक्षात आले आणि जुन्यांना डावलून त्यांना संपर्कप्रमुख आणि आता थेट उपमहापौर पद दिले हे देखील तितकेच खरे आहे. मात्र यासाठी नागरिकांनी दिलेल्या मतदानाचा अपमान करत प्रवीण तिदमे यांनी राजीनामा देणे योग्य नसल्याची चर्चा राजकीय वर्तुळात सुरू आहे. महानगर प्रमुख व नगरसेवक पदाचा राजीनामा देणार असल्याची पोस्ट सोशल मीडियावर तिदमे यांनी टाकली होती. या पोस्ट नंतर शहरातील राजकीय वातावरण तापले असून त्यांच्या समर्थकांमध्ये अस्वस्थता पसरली आहे. अनेक नागरिक व कार्यकर्ते तिदमे यांच्या घरी भेट देत आहेत. नागरिकांनी एकत्र येत निर्णय मागे घ्यावा अशी मागणी करण्यात येत आहे दरम्यान तिदमे नॉट रिचेबल असल्याने उपमुख्यमंत्री एकनाथ शिंदे, मंत्री दादा भुसे, संपर्कप्रमुख रामजी रेपाळे, हेमंत गोडसे, यांनी संपर्क साधला असल्याची माहिती तिदमे कुटुंबीयांनी दिली आहे उपमुख्यमंत्री एकनाथ शिंदे यांनी सांगितले की अन्याय होऊ देणार नाही त्यांना त्वरित माझ्याशी संपर्क करायला सांगा पक्षात काही सुधारणा होतात का हे बघणे महत्त्वाचे ठरेल असेही शिंदे म्हणाल्याचे समजते.उपमहापौर विलास शिंदे आणि उपनेते अजय बोरस्ते यांनी मुंबईला जाऊन उपमुख्यमंत्री एकनाथ शिंदे यांची भेट घेतल्याची माहिती समोर आली आहे. मात्र सर्वच गट या बैठकीत सहभागी नसल्याने मतभेद अद्याप कायम असल्याचे चित्र आहे. दरम्यान एकनाथ शिंदे नाशिक दौऱ्यावर येण्याची शक्यता व्यक्त होत असून या भेटीत तोडगा निघू शकतो, अशी अपेक्षा कार्यकर्त्यांमध्ये आहे.
