मंत्री गिरीश महाजन तळ ठोकून
नाशिक : भाजपमध्ये उमेदवारीवरून मोठा गोंधळ झाल्याने निष्ठावंत कार्यकर्ते मोठ्या प्रमाणात नाराज असल्याचे चित्र दिसत आहे. याचा फटका भारतीय जनता पार्टीला बसू नये यासाठी डॅमेज कंट्रोलचा प्रयत्न रात्रीपासून सुरू झाल्याची माहिती मिळत आहे. पंचवटी सिडको नाशिक रोड परिसरातील निष्ठावंत कार्यकर्त्यांना उमेदवारी नाकारण्यात आल्याने अनेक कार्यकर्त्यांनी उघडपणे नाराजी व्यक्त केली यामध्ये शहराध्यक्ष यांना गाजर दाखवत घेराव देखील घालण्यात आला होता. त्याचबरोबर ज्या इच्छुक उमेदवारांना भाजपने उमेदवारी दिली नसल्याने ते अपक्ष निवडणूक लढण्याच्या तयारीत आहेत. याचा फटका निवडणुकीत भाजपला बसण्याची शक्यता लक्षात घेता पक्षातील बंडखोरी शांत करण्यासाठी व नाराज असणार्‍यांची समजूत घालण्यासाठी स्वतः मंत्री गिरीश महाजन मैदानात उतरले असल्याची माहिती मिळत असून यासाठी ते रात्रीपासून नाशिक शहरात मुक्काम ठोकून आहेत. यामध्ये त्यांनी काही नाराज नेत्यांची भेट घेऊन त्यांना समजावण्याचा देखील प्रयत्न केल्याचे समजते. यामध्ये मंत्री गिरीश महाजन यांचे निकटवर्ती समजले जाणारे माजी नगरसेवक मुकेश शहाणे यांचा अर्ज बाद झाला तर सुधाकर बडगुजर यांच्या घरातील तीन सदस्यांना उमेदवारी मिळाली. मुकेश शहाणे यांच्या आधी नेते सुधाकर बडगुजर यांचा पुत्र दीपक बडगुजर यांनी अर्ज भरल्यामुळे एबी फॉर्म असूनही मुकेश शहाणे यांचा अर्ज बाद करण्यात आला. त्याचप्रमाणे सिडको परिसरातील दोन नगरसेवकांचा अर्ज देखील बात करण्यात आला आहे त्यामुळे माजी नगरसेविका भाग्यश्री ढोमसे आणि माजी नगरसेवक मुकेश शहाणे यांचा अर्ज बाद ठरल्याने भाजपच्या गोटात मोठ्या प्रमाणात नाराजी आहे. हीच नाराजी आज शमवण्याचे प्रयत्न मंत्री गिरीश महाजन करणार असून यामध्ये एका जागेवर सुधाकर बडगुजर यांची माघार होण्याची शक्यता असून या ठिकाणी मुकेश शहाणे यांचा मार्ग मोकळा होण्याची शक्यता आहे. त्याचप्रमाणे पक्षाला फटका बसू नये यासाठी मंत्री गिरीश महाजन काही निष्ठावंतांच्या घरी देखील जाणार असल्याची माहिती मिळत आहे मंत्री गिरीश महाजन यांच्या या दौऱ्यामुळे भाजपच्या अंतर्गत घडामोडींना मोठ्या प्रमाणात वेग आला असून वरिष्ठ स्तरावरून देखील बंडखोरी थांबवण्याचे प्रयत्न सुरू आहेत.
