महायुतीच्या वरिष्ठ नेत्यांमध्ये युतीची चर्चा झाल्याची माहिती
नाशिक : महापालिका निवडणुकीसाठी मंगळवारपासून अर्ज भरण्यास प्रारंभ झाला आहे तर दुसरीकडे भाजपकडून मोठ्याप्रमाणात मेगा भरती सुरू आहे. त्यामुळे भाजप, शिंदे गटाची शिवसेना,आणि अजित पवार गटाची राष्ट्रवादी यांच्यात युती होते की नाही याबाबत महायुतीच्या कार्यकर्त्यांमध्ये संभ्रम निर्माण झाला आहे.मात्र मुख्यमंत्री देवेंद्र फडणवीस व उपमुख्यमंत्री एकनाथ शिंदे महायुती साठी आग्रही असून स्थानिक नेत्यांना त्यांनी तश्या सूचना देखील दिल्या आहेत. मात्र शिंदे गटाच्या शिवसेनेने 122 जागांमध्ये 50 ते 45 जागांचा हट्ट कायम ठेवला आहे तर राष्ट्रवादी काँग्रेस 30 जागांवर अडून बसली आहे. त्यामुळे अजूनही महायुतीतील मित्र पक्षांमध्ये मतभेद कायम असल्याचे चित्र आहे. मात्र भारतीय जनता पार्टीने मधला मार्ग काढल्याची खात्रीलायक माहिती मिळत आहे. भाजपला सर्वाधिक 80 जागा त्या खालोखाल शिंदे गटाच्या शिवसेनेला 35 तर राष्ट्रवादी काँग्रेसला सहा आणि रिपब्लिकन पक्षाला एक जागा सोडणार असल्याची चर्चा वरिष्ठ पातळीवर सुरू आहे.असे झाल्यास अनेक इच्छुक उमेदवारांचा पत्ता कट होण्याची शक्यता आहे. त्याचबरोबर नाशिक महानगरपालिकेच्या निवडणुकीसाठी महाविकास आघाडीच ठरलं असून भाजप विरोधात अनेक छोटे पक्ष महाविकास आघाडीची साथ देण्यासाठी तयार झाल्याची माहिती मिळत आहे. मात्र महायुतीच्या बंडखोरांवर महाविकास आघाडी बारीक लक्ष ठेवून आहे.
