माजी नगरसेवकांनी हाती घेतला “धनुष्यबाण”
नाशिक : महानगरपालिकेच्या निवडणुकांचे पडघम केव्हाही वाजण्याची शक्यता बघता शहरात पक्षांतराचे वारे सुसाट वाहू लागले आहेत. काही दिवसांपूर्वी खा संजय राऊत यांचे निकटवर्तीय सुधाकर बडगुजर यांची ठाकरे गटाच्या शिवसेनेतून हकालपट्टी झाल्यानंतर त्यांनी भाजपात प्रवेश केला. यादरम्यान ठाकरे गटाचे महानगरप्रमुख विलास शिंदे नाराज असल्याची जोरदार चर्चा राजकीय वर्तुळात सुरू होती. विलास शिंदे यांच्या मुलीच्या लग्नात उपमुख्यमंत्री एकनाथ शिंदे यांनी हजेरी लावत शिंदे हे शिंदेंकडेच येणार असे सूचक विधान देखील केले होते त्यानंतर पुन्हा एकदा नाशिक दौऱ्यावर असलेले एकनाथ शिंदे यांचे स्वागत विलास शिंदे यांनी केले होते. या दोन भेटीनंतर शिंदे नक्कीच ठाकरे गटाला जय महाराष्ट्र करत शिंदेंच्या शिवसेनेत प्रवेश करणार हे निश्चित झाले . त्यानंतर शुक्रवारी (दि 27) च्या रात्री खा. संजय राऊत यांनी विलास शिंदे यांना महानगरप्रमुख पदावरून हटवत मामा राजवाडे यांच्याकडे महानगरप्रमुख पद सोपवले. त्यानंतर आज आज रविवारी (दि. 29) सकाळीच मोठं शक्ती प्रदर्शन करत मुंबईच्या दिशेने विलास शिंदे रवाना झाले. दरम्यान आज पक्ष प्रवेशावेळी विलास शिंदे यांच्याकडून उपमुख्यमंत्री एकनाथ शिंदे यांना चांदीची तलवार देखील भेट देण्यात आली. विलास शिंदे यांच्यासह नाशिकमधील काही नगरसेवकांनी उपमुख्यमंत्री एकनाथ शिंदे यांच्या शिवसेनेत प्रवेश केला. यामध्ये माजी नगरसेवक संतोष गायकवाड, नयना गांगुर्डे, विष्णूपंत बेडकुळे, पल्लवी पाटील, उषा शेळके, निलेश ठाकरे यांच्यासह पंचायत समिती सदस्य, आणि सरपंचांनी देखील शिंदे गटाच्या शिवसेनेत प्रवेश केला.मात्र महिनाभरात ठाकरे गटाच्या शिवसेनेला हा दुसरा धक्का मानला जात आहे. यावेळी जिल्हाप्रमुख अजय बोरस्ते, महानगरप्रमुख बंटी तिदमे यांच्यासह नाशिकचे प्रमुख पदाधिकारी उपस्थित होते.
