सिन्नरला वादळी वाऱ्यासह मुसळधार पाऊस
नाशिक : जिल्ह्याला जोरदार पावसाने झोडपले असून नदी नाल्यांना मोठ्याप्रमाणात पूर आल्याचे चित्र बघायला मिळत आहे. त्याचबरोबर या पावसाचा नाशिक जिल्ह्यातील सिन्नर बसस्थानकाला चांगलाच फटका बसला आहे. सिन्नर बसस्थानकाचा स्लॅब कोसळल्याची घटना घडली आहे. तुफानी पावसामुळे सिन्नर येथील हायटेक बसस्थानकाचा काही भाग कोसळल्याची गंभीर घटना समोर आली आहे. सिन्नर बसस्थानकात वीज पडल्याने स्लॅब कोसळल्याचे समजते हा स्लॅब शिवशाही आणि एका खाजगी कारवर कोसळला आहे. ज्यामुळे खाली उभ्या असलेल्या शिवशाही बसचे मोठे नुकसान झाले. सुदैवाने बसमधील प्रवाशांना आपत्कालीन मार्गाने बाहेर काढण्यात आले आहे. सर्व प्रवासी सुखरूप आहेत. त्याचबरोबर कारचे देखील मोठे नुकसान झाल्याची माहिती मिळत आहे. सुदैवाने यामध्ये कुठलीही जीवित हानी झाली नसल्याची समजत आहे. तसेच सध्या सिन्नर शहरात मुसळधार पाऊस सुरू असून, सरस्वती आणि देव नदीला पूर आल्याचे चित्र आहे.सिन्नर शहरातील सर्व रस्ते बंद झाले असून, वाहतूक ठप्प झाली आहे.
https://youtube.com/shorts/iEm4iGP2O80?si=z0JNlRviKRNwG9ez
