धक्कादायक….वृद्ध पत्नीचा पतीने आवळला गळा,स्वतःही घेतला गळफास
नाशिकरोड : परिसरात धक्कादायक घटना घडली असून सेवानिवृत्त प्राध्यापकाने त्यांच्या पत्नीचा गळा दाबून खून करत नंतर स्वतःही गळफास घेत जीवन संपविले असून मृत्यूपूर्व लिहलेल्या चिठ्ठीत ते म्हणतात मी माझ्या पत्नीवर खूप प्रेम करतो, तिला आजारपणातून मुक्त करत आहे व तिच्यासोबत मी पण मुक्त होत आहे. या घटनेने परिसरात खळबळ उडाली आहे. मिळालेल्या माहितीनुसार सेवानिवृत्त प्राध्यापक मुरलीधर रामचंद्र जोशी (80) व त्यांच्या पत्नी सेवानिवृत्त शिक्षिका लता जोशी हे एकदंत अपार्टमेंटमध्ये पहिल्या मजल्यावर राहतात. त्यांचा मुलगा संदीप हा पनवेल येथे प्राचार्य असून दुसरा मुलगा प्रसन्ना मुंबईला असून त्याचा लघुउद्योग आहे. तर लता जोशी आजारपणामुळे अंथरुणावर खिळून होत्या. गेल्या साडेतीन ते चार वर्षांपासून त्या आजारपणाबरोबर लढा देत होत्या. त्यामुळे त्यांची सेवा करण्यासाठी एका संस्थेमार्फत सीमा नावाच्या महिलेला केअर टेकर म्हणून कामावर ठेवले होते.दुपारी सीमा या काम आटोपून निघून गेल्यावर बुधवारी (दि9) रात्रीच्या सुमारास मुरलीधर जोशी यांनी मी माझ्या पत्नीवर खूप प्रेम करतो. तिला आजारपणातून मुक्त करत आहे….. अशी चिठ्ठी लिहून पत्नीचा गळा आवळला व स्वतःही गळफास घेतल्याची माहिती पोलिसांनी दिली. रात्री पुन्हा सीमा या घरी कामासाठी आल्या, त्यांनी त्यांच्या जवळील किल्लीने दरवाजा उघडला असता वृद्ध दांपत्य मृतावस्थेत अवस्थेत आढळले. वरिष्ठ पोलीस निरीक्षक जितेंद्र सपकाळे यांनी पथकासह घटनास्थळी धाव घेत पंचनामा केला. मृत्यूपूर्व चिठ्ठीत………. आत्महत्यापूर्वी जोशी यांनी लिहिलेल्या चिठ्ठीत माझे पत्नी लता वर खूप प्रेम आहे ती अंथरुणाला खिळून असून आजाराला वैतागून गेली आहे. तिला या आजारापासून मुक्त करण्यासाठी व तिच्यासोबत मी पण मुक्त होत आहे. घरकाम करणाऱ्या सीमा हिने पत्नी लता हिची खूप सेवा केली. तिच्यासाठी 50 हजार रुपये बाजूला काढून ठेवले असून ते तिला देण्यात यावे. आमच्या दोघांच्या अंत्यसंस्काराचे पैसे देखील ठेवले असून अंत्यसंस्कारासाठी कोणीही खर्च करू नये. तसेच पत्नी लता हिच्यावर अंत्यसंस्कार करण्यापूर्वी नवीन साडी मंगळसूत्र जोडवे असे सर्व घालून अंत्यसंस्कार करावे असा मजकूर चिठ्ठीत लिहिलेला असल्याचे पोलिसांनी सांगितले
