जमावाकडून हल्लेखोरांच्या गाड्यांची तोडफोड
नाशिक : शहरात पुन्हा गुन्हेगारीने डोके वर काढण्यास सुरवात केली असून काल रात्री (दि 8, शनिवार) भोसला स्कुल मागील संत कबीर नगर रस्त्यावर एका तरुणाचा टोळक्याने धारदार शस्त्राने वार करून निर्घृण खून केल्याची घटना घडली. मिळालेल्या माहितीनुसार अरुण राम बंडी (वय 29) हा रात्री संत कबीर नगर परिसरात आला असता मागील भांडणाची कुरापत काढून सातपूर परिसरातील कामगार नगर मधील टोळक्याने त्याला घेरत त्याच्यावर हल्ला केला. या हल्ल्यात त्याचा जागीच मृत्यू झाला अरुण रक्ताच्या थारोळ्यात पडल्याचे पाहून टोळके घटनास्थळावरून पसार झाले .या घटनेची माहिती परिसरात कळताच हल्लेखोरांच्या दोन दुचाकींची तोडफोड करण्यात आली. माहिती मिळताच गंगापूर पोलीस पथक घटनास्थळी दाखल झाले. यावेळी दंगल नियंत्रण पथकही बोलावण्यात आले. रात्री उशिरापर्यंत तिघा हल्लेखोरांना ताब्यात घेण्यात आले असून दोघे फरार असल्याचे पोलिसांनी सांगितले. या दरम्यान मृतदेह जिल्हा रुग्णालयात हलविण्यात आल्यानंतर रुग्णालय आवारात मोठ्या प्रमाणात गर्दी जमा झाली होती. याठिकाणी सरकारवाडा पोलिसांचा बंदोबस्त तैनात करण्यात आला होता. रात्री उशिरापर्यंत गंगापूर पोलीस ठाण्यात खुनाचा गुन्हा दाखल करण्याचे काम सुरू होते .
