ठोकल्या बेड्या,42 हजारांची मॅफेड्रॉन पावडर जप्त
नाशिक : शहरात एमडी ड्रग्जचा मोठ्याप्रमाणात शिरकाव झाला असून काही महिन्यांपूर्वी नाशिक पोलिसांनी ड्रग्जचा कारखाना उध्वस्त केला होता. यातील ड्रग्जचा मास्टर माईंड ललित पाटील हा देखील नाशिकचाच रहिवासी होता. ड्रग्जची पाळेमुळे खणून काढण्यासाठी पोलीस सर्व प्रयत्न करत असताना देखील शहरात ड्रग्ज विक्री सुरूच असून महाविद्यालय,वसतिगृह परिसरात ड्रग्ज विक्रीचा प्रयत्न केला जात आहे. गेल्या अनेक महिन्यांपासून अनेक ड्रग्ज विक्री करणाऱ्या पेडलरला बेड्या ठोकण्यात पोलिसांना यश आले असून काल पंचवटी पोलीस ठाण्याच्या हद्दीत म्हाडा घरकुल प्रकल्पाजवळ हिरावाडी परिसरात ड्रग्ज पेडलरला अमली पदार्थविरोधी पथकाने गजाआड केले .मिळालेल्या माहितीनुसार गुन्हे शाखेचे अमली पदार्थ विरोधी पथकाच्या वरिष्ठ पोलीस निरीक्षक सुशीला कोल्हे यांना मिळालेल्या गुप्त माहितीवरून सहाय्यक निरीक्षक सचिन चौधरी, विशाल पाटील, सहाय्यक उपनिरीक्षक रंजन बेंडाळे, संजय ताजने, मंगला जगताप, आदीच्या पथकाने हिरावाडीकडून जाणाऱ्या रस्त्यालगत सापळा रचला होता यावेळी संशयित सागर संजय पाटील (31 रा.गजानन पार्क) हा संशयास्पदरित्या मिळून आला. त्यास पथकाने ताब्यात घेत अंगझडती घेतली असता त्याच्याकडून 42 हजार 500 रुपये किमतीचे 8.5 ग्रॅम एमडी ड्रग्ज पावडर मिळून आली. सागर पाटील हा पोलिसांच्या रेकॉर्डवरील सराईत गुन्हेगार असून त्याच्यावर यापूर्वीही पंचवटी पोलीस ठाण्यात चोरी तर सिन्नर पोलीस ठाण्यात दरोड्याचा गुन्हा दाखल आहे.
