बिबट्याच्या हल्ल्यात पिता-पुत्र जखमी
नाशिक : वडनेर विहित गाव रस्त्यावर वालदेवी नदीकाठी असलेल्या हंडोरे मळ्या परिसरात खेळत असलेल्या चार वर्षे मुलावर सायंकाळी सात वाजेच्या सुमारास बिबट्याने झडप घालत हल्ला केला मात्र वडिलांच्या प्रसंगावधानाने मुलाला जबड्यातून सोडत बिबट्याला अखेर पळ काढावा लागला. सायंकाळच्या सुमारास विहित गाव वडनेर रस्त्यावर हंडोरे मळा भागात पत्र्याच्या शेड बाहेर अंगणात ऋषिकेश प्रकाश चंद्रे हा चार वर्षीय मुलगा खेळत होता यावेळी त्याचे वडील प्रकाश चंद्रे हे देखील बाजूला वसलेले होते. अचानक पणे सायंकाळी सात वाजेच्या सुमारास बिबट्याने मुलावर झडप घेत त्याला फरपटत नेण्याचा प्रयत्न केला असता वडिलांनी स्वतःच्या जीवाची परवा न करता बिबट्याचे पाठीमागील दोन्ही पाय ताकतीने धरून ठेवले.
त्यामुळे बिबट्याने जोरदार डरकाळ्या फोडत जबड्यातून मुलाला सोडले आणि प्रकाश चंद्रे यांच्या हातावर पंजा मारून धूम ठोकली. या दरम्यान तातडीने स्थानिक गावकऱ्यांच्या मदतीने जखमी मुलाला बिटको रुग्णालयात उपचारासाठी दाखल करण्यात आले. मुलाच्या गळ्याभोवती गंभीर जखम झाल्याने तिथून तातडीने पुणे महामार्गावरील उपनगर जवळच्या खाजगी रुग्णालयात उपचारासाठी हलविण्यात आले तेथे उपचार केल्यानंतर रात्री साडेनऊ वाजेच्या सुमारास वडाळा रोडवरील खाजगी रुग्णालयात मुलाला पुढील उपचारासाठी दाखल करण्यात आले. घटनेची माहिती मिळताच नाशिक वनपरिक्षेत्र कार्यालयाचे वनक्षेत्रपाल सुमित निर्मळ हे अधिकारी कर्मचाऱ्यांच्या पथकासह रुग्णालयात दाखल झाले. जखमी मुलाच्या उपचारासाठी सर्वतोपरी मदत वन विभागाकडून करण्यात येईल असे त्यांनी सांगितले. त्याच रात्री उशिरा शासकीय जिल्हा रुग्णालयातील अतिदक्षता विभागात मुलाला हलविण्यात आले. विहितगाव वडनेर रोड तसेच सहा क्रमांकाच्या जकात नाक्याकडे जाणाऱ्या मळे भागातील रस्त्याच्या परिसरात बिबट्याचा संचार आढळून येत असल्याची तक्रार नागरिकांनी अनेकदा वन विभागाकडे केली होती त्याठिकाणी पिंजरा लावण्यात आला आहे. मात्र अद्याप बिबट्या कैद होऊ शकला नाही
