नाशिक मुंबई आग्रा महामार्गावर घडलेला हा सगळा थरार व्हिडीओतून समोर
नाशिक : नाशिकचं भागवत कुटुंब इगतपुरीच्या भावली धरणावर निसर्गाचा आनंद घेण्यासाठी जातात. दुपारी दोन वाजता कुटुंब पोहोचतं, मात्र या निसर्गरम्य ठिकाणी दबा धरून बसलेले गावगुंड टवाळखोर या कुटुंबातील एका महिलेची छेड काढतात. कमेंट पास करतात. महिला जेव्हा कपडे बदलायला जाते, तेव्हा तिच्यावर अश्लील शेरेबाजी केली जाते. यादरम्यान पतीने या टवाळखोरांना जाब विचारला. आणि हाच जाब विचारणं त्या गुंडांच्या इगो हार्ट करण्यासाठी कारणीभूत ठरला, त्त्यांनी त्यांना संपवायचा प्लॅन आखला! समोरच्या दुकानावर उभे असलेले 8-10 तरुण एकत्र आले. त्यांनी भांडणाला सुरू केली.आणि त्यानंतर सुरू झाला कुटुंबाचा जीवघेणा थरार….कुटुंबाने जीव वाचवण्यासाठी कार पळवली. पण पाठीमागून दुचाकी आणि ‘बलेनो’ गाडीतून आलेल्या गुंडांनी सिनेस्टाईल पाठलाग सुरू केला. गाडीचा काचा हाताने फोडल्या, दगडफेक केली, लोखंडी रॉड,लाकडी दांडके याने कारवर हल्ला केला. एवढंच नाही, तर टोलनाका आला, तिथेही हल्ला केला. अखेर टोलनाक्याचे ब्रॅकेट तोडून या कुटुंबाला मुंबईच्या दिशेने पळ काढावा लागला. परिसरात मोबाईलला रेंज नव्हती, पोलिसांशी संपर्क होत नव्हता. 30 किलोमीटरपर्यंत मृत्यू मागून धावत होता! पुन्हा कार नाशिकच्या दिशेने वळवली. कार ज्या ठिकाणी ट्रॅफिक मुळे थांबेल त्या- त्या ठिकाणी कारवर जीवघेणा हल्ला करण्यात आला. तो धक्कादायक व्हिडिओ समोर नाशिकच्या भावली धबधबा परिसरातील पर्यटकांना मारहाण प्रकरणातील आणखी एक धक्कादायक व्हिडिओ समोर आला आहे. या व्हिडिओमध्ये या हल्लेखोरांपैकी एकाने या पर्यटकांच्या चालत्या गाडीला लटकून हल्ला केला. नाशिक मुंबई आग्रा महामार्गावर घडलेला हा सगळा थरार व्हिडीओतून समोर आला आहे. व्हिडिओमध्ये स्पष्टपणे हल्लेखोर गाडीला लटकलेला दिसत आहे. आणि त्यानंतर काही अंतरावर जाऊन तो लटकलेल्या गाडीवरून हायवेवर पडताना दिसत आहे. या प्रकरणातील फिर्यादींनी देखील त्यांच्या फिर्यादीत या घटनेचा उल्लेख केला होता. आता त्याच घटनेचा व्हिडिओ समोर आला आहे. हा व्हिडिओ रस्त्यावरील नागरिकांनी त्यांच्या मोबाईलमध्ये कैद केला होता. या प्रकरणात आत्तापर्यंत पोलिसांनी नऊ जणांना अटक केली आहे तर आणखी काही आरोपींचा शोध पोलिसांकडून सुरू आहे.
