उर्वरित आठ गुन्ह्यांबाबत पुढील आठवड्यात दोषारोपपत्र दाखल होणार
नाशिक : नाशिकमधील बहुराष्ट्रीय कंपनी टीसीएस मधील महिला कर्मचाऱ्यांचे लैंगिक शोषण आणि सक्तीने धर्मांतर प्रकरणात 1500 पानांचे दोषारोपपत्र दाखल करण्यात आले आहे. त्यात धक्कादायक खुलासे करण्यात आले आहेत. पीडितेचे नाव बदलण्यासाठी तिची मूळ कागदपत्रे हिसकावून घेण्यापासून ते धार्मिक भावना दुखावण्यापर्यंतचे अनेक गंभीर पुरावे पोलिसांच्या हाती लागले आहेत. या प्रकरणाने संपूर्ण राज्य हादरले होते. देवळाली कॅम्प पोलीस ठाण्यात दाखल असलेल्या या गुन्ह्यात पोलिसांनी दानिश इजाज शेख, तौसिफ बिलाल अत्तार, निदा एजाज खान आणि एमआयएमचा माजी नगरसेवक मतीन माजिद पटेल यांच्याविरुद्ध नाशिक रोड न्यायालयात दोषारोपपत्र सादर केले आहे. या सर्वांवर लैंगिक छळ, धर्मांतर आणि ॲट्रॉसिटी कायद्यांतर्गत गंभीर गुन्हे दाखल आहेत. या प्रकरणाचे गांभीर्य ओळखून पोलीस आयुक्त संदीप कर्णिक यांनी विशेष तपास पथकाची स्थापना केली होती, ज्यांनी हा सविस्तर तपास पूर्ण केला आहे. उर्वरित आठ गुन्ह्यांबाबत पुढील आठवड्यात दोषारोपपत्र दाखल होणार आहे. तपासादरम्यान पोलिसांनी 17 महत्त्वाच्या साक्षीदारांचे जबाब नोंदवले आहेत. केवळ तोंडी पुरावेच नाही, तर डिजिटल आणि तांत्रिक पुरावे गोळा करण्यावर पोलिसांनी भर दिला आहे. यामध्ये पीडिता आणि आरोपींचे मोबाईल व्हॉट्सॲप चॅट, स्क्रीनशॉट्स आणि ईमेल ट्रेल्सचा समावेश आहे.
या पुराव्यांवरवरून पीडितेचे सक्तीने धर्मांतर करण्याचे प्रयत्न आणि तिच्या धार्मिक भावनांना जाणूनबुजून ठेस पोहोचवल्याचे स्पष्ट होत असल्याचे पोलिसांनी म्हटले आहे. आरोपींनी पीडितेचे नाव बदलण्याच्या उद्देशाने तिची मूळ कागदपत्रे स्वतःच्या ताब्यात घेतली होती, ती देखील पोलिसांनी जप्त केली आहेत. दोषारोपपत्रात काय काय?
संशयित दानिश याने पीडितेवर इगतपुरीच्या एका रिसॉर्टमध्ये अत्याचार केले.
संशयित दानिश याने पीडितेला लोणावळा येथे नेले होते; तेथील पुराव्यांचा समावेश
संशयित दानिश, तौसिफ आणि निदा यांनी पीडितेच्या धर्मांतराचा प्रयत्न केला. पीडितेच्या घरातून संशयितांच्या धर्मांतील महिलांचा पोशाख, धार्मिक पुस्तके जप्त
संशयित निदा हिने पीडितेला दिलेल्या 171 सोशल मीडियावरील लिंक्स व त्याच्या विश्लेषणाचा समावेश
पॉश सदस्यांचे जबाब, प्रत्यक्षदर्शी साक्षीदार, नातलगांचे जबाब
संशयितांच्या मोबाइलमधून संकलित पुराव्यांसब प्रत्यक्ष संकलित पुराव्यांचा समावेश
कट रचून धर्मांतराच्या प्रयत्नाचे वाढील कलम
अॅट्रॉसिटी कायद्यान्वये देवळाली कॅम्पच्या गुन्ह्यात वाढील कलम 8 प्रकरणांचा तपास अजूनही सुरू
नाशिकच्या टीसीएस कंपनीशी संबंधित महिलांच्या तक्रारीवरून देवलाली कॅम्प आणि मुंबई नाका पोलीस ठाण्यात एकूण 9 गुन्हे दाखल करण्यात आले होते. सध्या देवलाली कॅम्पमधील एका मुख्य प्रकरणात दोषारोपपत्र दाखल झाले असले, तरी मुंबई नाका पोलीस ठाण्यातील उर्वरित 8 प्रकरणांचा तपासअद्याप सुरू या प्रकरणांमध्येही कायदेशीर मुदतीत दोषारोपपत्र दाखल करण्याची प्रक्रिया सुरू असल्याचे पोलिसांनी स्पष्ट केले आहे. दरम्यान, न्यायालयाने या प्रकरणातील सर्व आरोपींचे जामीन अर्ज यापूर्वीच फेटाळून लावले आहेत.
