नाशिक : लोकसभा निवडणुकीच्या पार्श्वभूमीवर राजकीय घडामोडींना मोठ्या प्रमाणात वेग आला आहे. गेल्या अनेक दिवसांपासून राष्ट्रीय समाज पक्षाचे अध्यक्ष महादेव जानकर हे शरद पवार गटाला पाठिंबा देणार असल्याची चर्चा होती. त्याचबरोबर माढयातुन निवडणूक लढवण्याची घोषणा जानकर यांनी केली होती. या संदर्भात त्यांनी शरद पवार यांची भेट देखील घेतली होती. यामुळे जानकर महायुतीतुन महाआघाडीत जातील अशी चर्चा सुरू होती. यानंतर मात्र रासपचे नेते महादेव जानकर यांनी महायुतीत सहभागी होण्याचा निर्णय जाहीर केला. आज त्यांनी जाहीर केलेल्या निर्णयानंतर आता ते महायुती सोबत राहतील स्पष्ट झाले आहे. महायुतीकडे त्यांनी तीन जागा मगितल्याची चर्चा होती. मात्र एक जागा निश्चित होण्याची शक्यता असल्याचे सुनील तटकरे यांनी म्हटले आहे ही जागा म्हणजे परभणी असू शकते अशी सूत्रांची माहिती आहे.
