नाशिक महापालिकेच्या महापौरपदासाठी आरक्षण जाहीर होताच शहराचे राजकारण तापले असून पडद्यामागे मोठ्या हालचाली सुरू झाल्या आहेत. महापौरपद खुल्या महिला प्रवर्गासाठी राखीव झाल्यानंतर बहुमत मिळालेल्या भाजपमध्ये इच्छुकांची संख्या वाढली असून, महापौर पदासाठी व इतरही प्रमुख पदांसाठी जोरदार लॉबिंग सुरू असल्याचे चित्र स्पष्ट झाले आहे. राज्यातील 29 महानगरपालिकांसाठी मंत्रालयात नगरविकास राज्यमंत्री माधुरी मिसाळ यांच्या उपस्थितीत महापौरपदाची आरक्षण सोडत जाहीर करण्यात आली. 50 टक्के महिला आरक्षणाच्या नियमानुसार यंदा राज्यातील 15 महापालिकांमध्ये महिला महापौर असणार असून 14 महापालिकांमध्ये सर्वसाधारण प्रवर्गाला संधी मिळाली आहे. या सोडतीत नाशिक महापालिकेचे महापौरपद खुल्या महिला प्रवर्गासाठी राखीव झाल्याने सत्ता मिळवलेल्या भाजपमध्ये महापौरपदासाठी स्पर्धा अधिक तीव्र झाली आहे.नाशिकमध्ये महापौरपदासाठी हिमगौरी आडके यांचे नाव सध्या सर्वाधिक प्रबळ दावेदार म्हणून पुढे येत आहे. त्यांनी याआधी महापालिकेच्या स्थायी समितीच्या सभापतीपदाची जबाबदारी यशस्वीपणे पार पाडली आहे. त्यांचे बंधू राहुल आहेर हे चांदवड विधानसभा मतदारसंघाचे आमदार असून, आहेर कुटुंब हे भाजपशी एकनिष्ठ राहिलेले आहे. आगामी कुंभमेळ्याच्या पार्श्वभूमीवर सुसंस्कृत, अभ्यासू आणि प्रशासकीय अनुभव असलेला चेहरा महापौरपदी देण्याकडे भाजपचा कल असल्याने हिमगौरी आडके यांचे नाव आघाडीवर मानले जात आहे.महापौर आरक्षण सोडतीनंतर मंत्री गिरीश महाजन यांनी महापालिकेत आयुक्तांची भेट घेतली आहे. महापौरपदाच्या प्रबळ दावेदार हिमगौरी आडके यांनी मंत्री गिरीश महाजन यांची भेट घेतली आहे. तर गणेश गीते, सुधाकर बडगुजर, सुरेश पाटील हे देखील महत्त्वाच्या पदांसाठी महाजनांच्या भेटीसाठी दाखल झाल्याचे चित्र होते. मंत्री गिरीश महाजन यांनी सुधाकर बडगुजर यांच्या म्युनिसिपल कर्मचारी सेनेच्या कार्यालयालाही भेट दिली असून नाशिक महापालिकेतील इतर प्रमुख पदांसाठी नगरसेवकांकडून जोरदार लॉबिंग सुरू असल्याचे चित्र आहे.
