राजकीय क्षेत्रात खळबळ
नाशिक : शहरात आता भाजपा नंतर शिंदे गटाच्या शिवसेनेत उमेदवारीवरून मोठ्या प्रमाणात वाद उफाळून आल्याचे चित्र दिसत आहे.प्रभाग क्रमांक 31 मधील इच्छुक उमेदवार शिवा तेलंग यांनी पत्नीसह आत्महत्येचा इशारा दिल्याने नाशिकच्या राजकीय वर्तुळात मोठी खळबळ उडाली असून शिवा तेलंग यांनी सोशल मीडियावर एक दीर्घ पत्र पोस्ट करत थेट पक्षातील काही स्थानिक प्रमुख नेत्यांवर गंभीर आरोप केले आहेत. शिवा तेलंग यांनी आपल्या पत्रात नमूद केले आहे की, 2022 साली त्यांनी आणि त्यांची पत्नी पूजा तेलंग यांनी शिंदेंच्या शिवसेनेत प्रवेश करून प्रभाग क्रमांक 31 मध्ये पक्षाच्या माध्यमातून समाजसेवेचे काम सुरू केले. प्रभागातील नागरिकांच्या सुखदुःखात सहभागी होत अनेक कार्यक्रम, विकासकामे आणि पक्षसंघटन मजबूत करण्यासाठी त्यांनी योगदान दिले. मात्र माजी नगरसेवक ढेमसे यांनी आपला केवळ राजकीय वापर केल्याचा आरोप त्यांनी केला आहे. त्याचबरोबर पक्षप्रवेशाच्या वेळी मोठ्या निधीची कमिटमेंट करण्यात आली होती. प्रभागात तब्बल 11 कोटी रुपयांचा निधी मंजूर झाला, मात्र प्रत्यक्षात फक्त भूमिपूजन झाले, कामे कुठेच झाली नाहीत. आलेला निधी नेमका कुठे गेला, याची चौकशी झाली पाहिजे, अशी मागणीही त्यांनी केली आहे. माजी नगरसेवकांच्या माध्यमातून निधी आणल्याचा दावा करण्यात आला, मात्र प्रत्यक्ष कामे कुठेच न झाल्याचा आरोपही त्यांनी केला आहे. विशेष म्हणजे, प्रभागात एकाच वेळी दोन जणांना एबी फॉर्म देण्यात आल्याने मोठा गोंधळ निर्माण झाला. पक्षश्रेष्ठींकडून आपल्याला पुरस्कृत करण्याचे आदेश दिले असतानाही ते अमलात न आणल्याचा आरोप करण्यात आला आहे. स्वतः एकनाथ शिंदे यांची भेट घेऊन सगळी माहिती दिल्यानंतरही स्थानिक पातळीवर निर्णय बदलण्यात आल्याने आपला विश्वासघात झाल्याची भावना शिवा तेलंग यांनी व्यक्त केली आहे.29 तारखेला रात्री कॅनडा कॉर्नर येथे एबी फॉर्मचे वाटप सुरू असताना मोठ्या प्रमाणात पैशांची देवाणघेवाण सुरू असल्याचा गंभीर आरोप शिवा तेलंग यांनी केला आहे.एबी फॉर्म मिळवण्यासाठी पैसे मागितल्याचा आणि पैसे देऊन फॉर्म घेण्यात आल्याचा आरोपही त्यांनी केला आहे. पत्राच्या शेवटी शिवा तेलंग यांनी अत्यंत गंभीर इशारा देत आपल्या संभाव्य आत्महत्येस स्थानिक वरिष्ठ नेते जबाबदार राहतील, असा स्पष्ट उल्लेख केला आहे. “मी उद्या तुमच्यामध्ये नसणार आहे,” असे नमूद करत त्यांनी पत्नी व मुलांना न्याय देण्याची विनंती नागरिकांना केली आहे. दरम्यान, हे पत्र सोशल मीडियावर व्हायरल झाल्यानंतर शिवा तेलंग हे ‘नॉट रिचेबल’ असल्याने चिंता व्यक्त केली जात आहे. या संपूर्ण प्रकारामुळे शिंदेंच्या शिवसेनेतील तिकीट वाटपाची पद्धत आणि आर्थिक व्यवहारांवर गंभीर प्रश्न उपस्थित झाले असून, उपमुख्यमंत्री एकनाथ शिंदे या घटनेची दखल घेतील का याकडे राजकीय वर्तुळाचे लक्ष लागून आहे
