पोलीस धडक कारवाई करत असताना देखील नायलॉन मांजाचा सर्रास वापर
नाशिक : आज नववर्षाचा पहिला सण मकरसंक्रांत उत्साहात साजरा होत असतानाच व नायलॉन मांजावर बंदी असताना देखील पाथर्डी परिसरात नायलॉन मांजामुळे गळा कापल्याने दुर्देवाने एका तरुणाला आपला जीव गमवावा लागल्याची वेदनादायक घटना घडली आहे.याबाबत अधिक माहिती अशी की, सोनू किशोर धोत्रे (वय २३, राहणार चारणवाडी, देवळाली कॅम्प, नाशिक)
असे नायलॉन मांजामुळे गळा कापून मृत्यू झालेल्या व्यक्तीचे नाव असून आज सकाळी धोत्रे हा पाथर्डी फाटा येथून वडनेर रोड मार्गे दुचाकीवरून जात असताना त्याचा नायलॉन मांजामुळे गळा कापला गेला.यादरम्यान मोठ्या प्रमाणात रक्तस्त्राव सुरू असल्यामुळे धोत्रे या तरुणाला लागलीच घटनास्थळी जमा झालेल्या नागरिकांनी जिल्हा शासकीय रुग्णालयात उपचारासाठी दाखल केले. मात्र, सकाळी साडेअकरा वाजेच्या सुमारास त्याचा मृत्यू झाला. याप्रकरणी इंदिरानगर पोलिस पुढील तपास करीत आहेत. शहरात पोलिसांनी नायलॉन मांजा वापरणाऱ्यांविरोधात कारवाई करत अनेकांवर सदोष मनुष्य वधाचे गुन्हे देखील दाखल केले आहेत.
