व्हॉटेलच्या वेटरवर रोखली पिस्तुल, पोलीस अंमलदाराला अटक
नाशिक : एकीकडे राजकीय नेत्यांनी पोसलेले गुंड कशी दादागिरी करतात याचे महाराष्ट्रातील बीड प्रकरण ताजे असतानाच नाशिक शहरात सत्ताधारी पक्षातील आमदाराच्या बॉडिगार्डने म्हणजेच अंगरक्षकाने कर्तव्यावर असताना हॉटेलमधील वेटरवर अगदी किरकोळ कारणातून रिव्हॉल्व्हर रोखल्याने खळबळ उडाली आहे.त्यास अटक करत गुन्हा दाखल करण्यात आला आहे. मिळालेल्या माहितीनुसार नाशिकरोड रेल्वे स्थानक जवळ असणाऱ्या हॉटेल रामकृष्ण येथे ग्रामीण पोलीस मुख्यालयातील अंमलदार व आमदार सुहास कांदे यांचे बॉडिगार्ड (अंगरक्षक)असलेले विशाल झगडे(1356) हे जेवणासाठी गुरुवारी (दि 9)रात्री साडेबारा वाजेच्या सुमारास गेले असताना हॉटेल व्यवस्थापक सागर पाटील यांच्या हॉटेलमध्ये वेटर म्हणून काम करणाऱ्या सिराण शेख याने झगडे यांना ऑर्डर घेताना पोळी नसल्याचे सांगितले त्यावरून झगडे आणि त्यांच्या बरोबर असलेल्या दोघांनी वाद घालत दमबाजी केली. यादरम्यान हातावर “पोलीस” अक्षर गोदविलेल्या संशयित इसमाने कंबरेला असलेली पिस्तूल काढून वेटर असलेल्या शेखवर रोखत मला पोळी पाहिजे, तू तिकडे काहीही कर… असा दम भरला ही माहिती हॉटेल मालक विनोद भगत यांना कळवण्यात आली.
यावेळी अन्य वेटर असलेल्या लोकांनीही काही दिवसांपूर्वी याच व्यक्तीने किरकोळ कारणावरून हॉटेलमध्ये वाद घातल्याची माहिती दिली. यादरम्यान संबधित व्यक्तीची माहिती घेतली असता बंदूक रोखणारा संशयित हा नाशिक पोलीस ग्रामीण मुख्यालयातील कर्मचारी असून आमदार सुहास कांदे यांचा अंगरक्षक(बॉडीगार्ड) विशाल झगडे असल्याची माहिती समजली. पाटील व शेख यांच्या तक्रारीवरून नाशिकरोड पोलीस ठाण्यात बीएनएस कलम 352,351 व शस्त्र अधिनियमांतर्गत झगडे यांच्या विरुद्ध गुन्हा दाखल करण्यात आला आहे. वेटरवर झगडे यांनी रोखलेली सर्विस रिव्हॉल्व्हर पोलिसांकडून जप्त करण्यात आली आहे तसेच झगडे यास अटक करून नाशिक रोड न्यायालयात हजर करण्यात आली न्यायालयाने दोन्ही बाजूंचा युक्तिवाद ऐकून घेत त्यांना जामीन मंजूर केला अशी माहिती वरिष्ठ पोलीस निरीक्षक अशोक गिरी यांनी दिली आहे. याबाबत पोलीस अधीक्षक कार्यालयाकडून या प्रकरणाची गंभीर दखल घेण्यात आली असून झगडे यांचीही वर्तणूक पोलीस दलाची प्रतिमा मलिन करणारी असून त्यांचे निलंबन होण्याची शक्यता व्यक्त करण्यात येत आहे.
