नायलॉन मांजा वापरणाऱ्यांवर कठोर कारवाई करण्याचे मनपा आयुक्त खत्री यांचे संकेत
नाशिक : नायलॉन मांजामुळे सामान्य नागरिकांचे जीव धोक्यात येत असून काल नाशिक येथे झालेल्या घटनेत तरुणाचा गळा चिरून 75 टाके पडले तर दुसऱ्या घटनेत अजून एका तरुणाच्या गळ्याला नायलॉन मांजामुळे 10 टाके पडल्याने नागरिकांमध्ये संतापाचे वातावरण निर्माण झाले आहे. नायलॉन मांजा वापरू नये व साठवणूक करू नये असे निर्देश महाराष्ट्र राज्याच्या विधान परिषदेच्या उपसभापती नीलम गोऱ्हे यांनी महाराष्ट्रातील सर्व जिल्हाधिकारी कार्यालयातील अधिकारी, सर्व महानगरपालिका आयुक्त, पोलीस आयुक्तालयातील अधिकारी यांच्यासह प्रमुख अधिकाऱ्यांची व्हिडीओ पण कॉन्फरन्सिगद्वारे बैठक घेत दिले. मनपा आयुक्त मनीषा खत्री यांनी नायलॉन मांजा वापरणाऱ्यांवर कठोर कारवाई करण्याची भूमिका स्पष्ट केली. नायलॉन म्हणजे पर्यावरणीय धोका असून ते पक्षी, प्राणी आणि मानवासाठी धोकादायक असल्याचे खत्री यांनी सांगितले. नायलॉन मांजा वापरण्यांविरुद्ध व साठवणूक करणाऱ्या विरुद्ध तसेच विक्री करताना आढळून आल्यास कारवाई करण्याचे संकेत दिले. नायलॉन मांजामुळे अनेक पक्षी जखमी होत आहे किंवा मृत्यूमुखी पडत आहे. यादरम्यान आयुक्त मनीषा खत्री यांनी सर्व नाशिककरांना सहकार्याची अपेक्षा व्यक्त केली. नायलॉन मांजाच्या वापरामुळे होणारे नुकसान ओळखून सामाजिक जबाबदारी घेतली पाहिजे असे आवाहनही त्यांनी केले.पतंगाच्या स्पर्धांमध्ये केवळ पारंपारिक कापडाचा मांजा वापरण्याचे आवाहन केले आहे. नायलॉन मांजा विरोधी व्हिडिओ कॉन्फरन्सला मनपा अतिरिक्त आयुक्त स्मिता झगडे पर्यावरण विभाग प्रमुख अजित निकत उपस्थित होते.
