वंचित बहुजन आघाडी व भाजपला खिंडार
नाशिक : एकीकडे नाशकात बोचरी थंडी वाढत असताना विधानसभेच्या निवडणुकीमुळे वातावरण मात्र गरम झाल्याचे चित्र आहे. नाशकात देखील ठाकरे गटाच्या शिवसेनेने वंचित बहुजन आघाडी व भाजपला दे धक्का दिला आहे. माजी नगरसेवक आणि वंचित बहुजन आघाडीचे जिल्हाध्यक्ष पवन पवार व भाजपचे विक्रम नागरे यांनी आपल्या पक्षांना सोडचिठ्ठी देत ठाकरे गटाच्या शिवसेनेत प्रवेश करणार असल्याची माहिती खा संजय राऊत यांनी दिली. 15 तारखेला उद्धव ठाकरे यांची हुतात्मा अनंत कान्हेरे मैदानावर जाहीर सभा होणार आहे. यावेळी पवन पवार, विक्रम नागरे त्याचबरोबर भाजपचे काही नगरसेवक ठाकरे गटाच्या शिवसेनेत प्रवेश करणार असल्याचे राऊत म्हणाले. पश्चिम मतदारसंघात विद्यमान आमदार सीमा हिरे यांना भाजपने उमेदवारी दिल्यानंतर तेथिल भाजप पदाधिकारी विक्रम नागरे नाराज होते तर वंचित बहुजन आघाडीचे पवन पवार हे देवळाली मतदारसंघातून उमेदवारी साठी इच्छुक होते मात्र जिल्हा कार्यकारिणीने वरिष्ठांपर्यंत चुकीची माहिती कळवल्याने त्यांना उमेदवारी मिळाली नसल्याचा त्यांचा आरोप आहे . वंचित कडून त्यांच्यावर कारवाई पक्षविरोधी काम केल्याचा ठपका ठेवत पवन पवार यांना वंचित बहुजन आघाडीने तीन वर्षांसाठी पक्षातून निलंबित केले आहे. त्यांचे पक्षाचे प्राथमिक सदस्यत्वही रद्द करण्यात आले असून, पक्षाच्या सर्व जबाबदाऱ्यांतून त्यांना मुक्त करण्यात आले आहे. यासंदर्भातील पत्र वंचितचे अध्यक्ष अँड. प्रकाश आंबेडकर यांच्या स्वाक्षरीने देण्यात आले आहे.
